Jańa júzý basseininiń qurylysy kelesi jyldyń basynda bastalady. Nysan eki jyldan keiin paidalanýǵa beriledi dep kútilýde. Olimpiadalyq standarttarǵa sáikes salynatyn bassein alańy 27 myń sharshy metrdi quraidy. Taǵy bir ereksheligi – sáýlettik keipi balyq sulbasyna uqsaǵan.
– Biz qashanda sportqa erekshe mán berýge tyrysamyz, óitkeni sport – ulttyń saýlyǵy. Bul týraly Memleket basshysy Nursultan Ábishuly Nazarbaev únemi aityp júredi. Sondyqtan elimizde teńdesi joq bassein salýdy qolǵa almaqpyz. Bul ýaqyt óte kele Taldyqorǵandy sý sporty túrleriniń ortalyǵyna ainaldyrýǵa múmkindik beredi dep oilaimyn, – dedi Amandyq Batalov.
Sonymen qatar óńir basshysy jańa basseinde álemdik deńgeidegi jarystar ótkizýge bolatynyn aitty. Sebebi jańa ǵimarat 4 basseindi qamtityn bolady. Ekeýiniń uzyndyǵy 50 metrden, eni 25 metrden, taǵy ekeýi olimpiadalyq oiyndarǵa arnalǵan: bireýi jattyǵýǵa, ekinshisi jarysqa laiyqtalǵan.
– Munda sý sporty túrlerinen álem chempionatyn ótkizýge bolady. Al jarystardan tys ýaqytta qalalyqtar osy ǵimaratta júzýmen ainalysýǵa múmkindik alady. 50 metrge júzýdi árkim de qalaityn shyǵar. Munda eń úzdik jattyqtyrýshylar jumys istep, bolashaq chempiondardyń shynyǵýyna qajetti barlyq jaǵdailar jasalady. Munyń bári – halyqtyń igiligi úshin, – dedi oblys ákimi A. Batalov sózin qorytyndylap.
«Pliýs Aktsent» JShS sáýletshisi Esim Mamanovtyń aitýynsha, bassein qurylysyn jobalaý kezinde onyń kóp salalyǵyna, jailylyǵyna jáne estetikalyq keipine nazar aýdarylǵan.
– Ǵimarat jer deńgeiinen tómen, al tribýna deńgeii 3 metrge joǵary salynady. Amfitetar formasynda bolmaq. Bul kórermenderdiń sportshylardyń árbir qimylyn jiti baqylaýyna múmkindik berý úshin jasalyp otyr. Taǵy 5, 7, 10 metrlik tramplinder josparlanǵan. Sonymen qatar basseindi sinhrondy júzý úshin paidalanýǵa bolady. Basseindi qalanyń kórnekti oryndarynyń birine ainaldyrý - aldymyzǵa qoiylǵan maqsattyń biri. Sondyqtan onyń syrtqy kelbetine erekshe talǵammen qaradyq. Eń sońynda balyq keipine uqsaityn formaǵa kelip toqtaldyq, – dedi Esim Mamanov.
Jalpy jabyq bassein jertólesi bar úsh qabatty ǵimarat bolmaq. Ámbebap bassein júzý, akvaaerobika, sýdaǵy shógen, sýǵa sekirý boiynsha oqý-jattyǵý ótkizýge, turǵyndar úshin saýyqtyrýǵa arnalǵan júzýge, balalardy júzýge úiretýge, sol siiaqty kórermenderdiń qatysýymen ótetin jarystarǵa arnalǵan. Kórermender tribýnasyna 2 myń adam siiady. Sondai-aq múmkindigi shekteýli azamattardyń da júzýmen ainalysýyna jaǵdai jasalady.
Almaty oblysy ákiminiń baspasóz qyzmeti
https://dalanews.kz/31118
