جاڭا ءجۇزۋ باسسەينىنىڭ قۇرىلىسى كەلەسى جىلدىڭ باسىندا باستالادى. نىسان ەكى جىلدان كەيىن پايدالانۋعا بەرىلەدى دەپ كۇتىلۋدە. وليمپيادالىق ستاندارتتارعا سايكەس سالىناتىن باسسەين الاڭى 27 مىڭ شارشى مەتردى قۇرايدى. تاعى ءبىر ەرەكشەلىگى – ساۋلەتتىك كەيپى بالىق سۇلباسىنا ۇقساعان.
– ءبىز قاشاندا سپورتقا ەرەكشە ءمان بەرۋگە تىرىسامىز، ويتكەنى سپورت – ۇلتتىڭ ساۋلىعى. بۇل تۋرالى مەملەكەت باسشىسى نۇرسۇلتان ءابىش ۇلى نازاربايەۆ ۇنەمى ايتىپ جۇرەدى. سوندىقتان ەلىمىزدە تەڭدەسى جوق باسسەين سالۋدى قولعا الماقپىز. بۇل ۋاقىت وتە كەلە تالدىقورعاندى سۋ سپورتى تۇرلەرىنىڭ ورتالىعىنا اينالدىرۋعا مۇمكىندىك بەرەدى دەپ ويلايمىن، – دەدى اماندىق باتالوۆ.
سونىمەن قاتار ءوڭىر باسشىسى جاڭا باسسەيندە الەمدىك دەڭگەيدەگى جارىستار وتكىزۋگە بولاتىنىن ايتتى. سەبەبى جاڭا عيمارات 4 باسسەيندى قامتيتىن بولادى. ەكەۋىنىڭ ۇزىندىعى 50 مەتردەن، ەنى 25 مەتردەن، تاعى ەكەۋى وليمپيادالىق ويىندارعا ارنالعان: بىرەۋى جاتتىعۋعا، ەكىنشىسى جارىسقا لايىقتالعان.
– مۇندا سۋ سپورتى تۇرلەرىنەن الەم چەمپيوناتىن وتكىزۋگە بولادى. ال جارىستاردان تىس ۋاقىتتا قالالىقتار وسى عيماراتتا جۇزۋمەن اينالىسۋعا مۇمكىندىك الادى. 50 مەترگە ءجۇزۋدى اركىم دە قالايتىن شىعار. مۇندا ەڭ ۇزدىك جاتتىقتىرۋشىلار جۇمىس ىستەپ، بولاشاق چەمپيونداردىڭ شىنىعۋىنا قاجەتتى بارلىق جاعدايلار جاسالادى. مۇنىڭ ءبارى – حالىقتىڭ يگىلىگى ءۇشىن، – دەدى وبلىس اكىمى ا. باتالوۆ ءسوزىن قورىتىندىلاپ.
«پليۋس اكسەنت» ج ش س ساۋلەتشىسى ەسىم مامانوۆتىڭ ايتۋىنشا، باسسەين قۇرىلىسىن جوبالاۋ كەزىندە ونىڭ كوپ سالالىعىنا، جايلىلىعىنا جانە ەستەتيكالىق كەيپىنە نازار اۋدارىلعان.
– عيمارات جەر دەڭگەيىنەن تومەن، ال تريبۋنا دەڭگەيى 3 مەترگە جوعارى سالىنادى. امفيتەتار فورماسىندا بولماق. بۇل كورەرمەندەردىڭ سپورتشىلاردىڭ ءاربىر قيمىلىن ءجىتى باقىلاۋىنا مۇمكىندىك بەرۋ ءۇشىن جاسالىپ وتىر. تاعى 5، 7، 10 مەترلىك ترامپليندەر جوسپارلانعان. سونىمەن قاتار باسسەيندى سينحروندى ءجۇزۋ ءۇشىن پايدالانۋعا بولادى. باسسەيندى قالانىڭ كورنەكتى ورىندارىنىڭ بىرىنە اينالدىرۋ - الدىمىزعا قويىلعان ماقساتتىڭ ءبىرى. سوندىقتان ونىڭ سىرتقى كەلبەتىنە ەرەكشە تالعاممەن قارادىق. ەڭ سوڭىندا بالىق كەيپىنە ۇقسايتىن فورماعا كەلىپ توقتالدىق، – دەدى ەسىم مامانوۆ.
جالپى جابىق باسسەين جەرتولەسى بار ءۇش قاباتتى عيمارات بولماق. امبەباپ باسسەين ءجۇزۋ، اكۆااەروبيكا، سۋداعى شوگەن، سۋعا سەكىرۋ بويىنشا وقۋ-جاتتىعۋ وتكىزۋگە، تۇرعىندار ءۇشىن ساۋىقتىرۋعا ارنالعان جۇزۋگە، بالالاردى جۇزۋگە ۇيرەتۋگە، سول سياقتى كورەرمەندەردىڭ قاتىسۋىمەن وتەتىن جارىستارعا ارنالعان. كورەرمەندەر تريبۋناسىنا 2 مىڭ ادام سيادى. سونداي-اق مۇمكىندىگى شەكتەۋلى ازاماتتاردىڭ دا جۇزۋمەن اينالىسۋىنا جاعداي جاسالادى.
الماتى وبلىسى اكىمىنىڭ باسپا ءسوز قىزمەتى
https://dalanews.kz/31118
