Jýrnalistikadaǵy aqqan juldyz atanǵan dara tulǵanyń búgin dúnie esigin ashqan kúni. Onyń úni de, bolmysy da týǵan elimen birge astasyp jatyr. Ol aqparat áleminiń temirqazyǵy bolatyn. Kózi tiri bolǵanda 49 jasqa tolar edi. Júregi soǵysyn toqtatqansha qazaǵym dep ótken nar tulǵa árine, Beisen Quranbek.
Bar alashtyń qabyrǵasyn qaiystyrǵan qaraly habar el arasynda taraǵannan beri jartyjyldan astam ýaqyt ótse de, onyń bes kún jalǵanda joq ekenine eshkim nanar emes.
Beisen Abaiulynyń kisiligi men kishiligi bir tóbe. Bar qazaqty baýyr tutyp, qarasha halyqty han kórip, tóbesine kóterip júrdi. Sonysynan bolsa kerek, qalyń eli Beisen uldaryn erekshe qurmettedi. Keýdesindegi judyryqtai júreginen oryn berdi.
Abai aǵanyń ulynyń sonaý, sport gazetinde jýrnalistikanyń alǵash tabaldyryǵyn attap, tuńǵysh týyndylaryn bastap, keshe ǵana aqsuńqar bolyp máńgilik saparyna attanǵan kezdegi bar ǵumyr joly kóptiń nazarynda boldy.
«Beisenniń artyqshylyǵy nede desek,ol áýelden basqalarǵa baqyt syilaýǵa umtylǵan azamat der edim»,- deidi oblystyq «Jetisý» gazetiniń bas redaktory Ámire Árin. Rasynda, bul sózdiń jany bar. Baqytty bolý degen sóz, ózgeni baqytty etý emes pe?
Quranbek áýletiniń mańdaiǵa basqan juldyzynyń BAQ salsyna bas burǵany, halqynyń baqytty bolýyna úles qosqysy kelgenimen bailanysy bar-dai. Kózi tirisinde «Aitýǵa ońai», «Qareket» syndy áleýmettik-tok shoýlardy júrgize otyryp, bazynaly eldiń basty máselesin sheshýge at salysty. Bunyń ózi qarashaǵa baqyt syilaý emes pe.
...
QR Prezident syilyǵynyń ieci, Eńbek eri, qazaq balalary ishinen tuńǵysh ret aikido sportynan qara belbeýge qol jetkizgen , jalyn atyp júrip janyp ketken daryn, Beisen Quranbekti buqara halyq eshqashan esinen shyǵarmaidy.
Sonyń jarqyn kórinisi, ózi irge tasyn qalaýǵa muryndyq bolǵan «Jýrnalister úiinen» arnaiy murajai buryshynyń ashylýy. Keleli jumys Almaty oblysy ákimdiginiń qoldaýymen iske asyp otyrǵan jaiy bar.
Atalǵan buryshtamanyń lentasyn Beisen aǵanyń inisi Tólegen aǵa men dosy Serik Ábikenuly qidy. Murajaiǵa telejúrgizýshiniń ózi tutynǵan zattary ornalastyrylǵan. Sansyz alǵys hattary men diplomdarynyń bir parasy, tósbeligleri, qolsaǵaty, qalamsaby men qoiyn dápteri, sporttyq jáne kógildir ekran aldyna shyqqanda kigen kiimderin mýzei buryshynan kórýge bolady.
Uldarynyń rýhyna taǵyzym etip, eske alýǵa kelgen halyqtyń qarasy kóp.
Olardyń ishinde aǵanyń týǵan-týys, dos-jaran, úzeńgiles áriptesteri men el aǵalary da bar. Mýzeidiń alyshýyna kelgen, kóz kórgen tanystary Beisen Quranbektiń jarqyn beinesi týraly aityp jatty. Solardyń biri jan joldasy, ári áriptesi, oblystyq «Jetisý» telearnasynyń direktory Serik Ábikenuly.
«Qiyn-qystaý kezeńge qaramai búgingi sharaǵa kelgenderińizge basymyzdy iip, alǵys aitamyz. Bul murajai osydan 4 ai buryn ashylýy kerek edi. Quranbek áýletine úlken bir qiyndyqtar keldi. Beisenniń artynan ata-anasy da ketti. Sonymen bul isti keiinge shegerdik.
Osy shaǵyn buryshty Beisekeńniń arýaǵy razy bolsyn, ony qadirleitin qalyń qazaq osynda kelip bir sát esine alsyn degen oimen ashyp otyrmyz. Oǵan oblys ákiminiń orynbasary Rýstam Áli qol ushyn sozyp, bir kisidei qoldaý kórsetti.
Beisenniń sharapaty tigen myńdaǵan adam elimizdiń ár túkpirinde júr. Dosyń týraly ótken shaqta sóilegennen aýyr nárse joq eken. Desede, Beisenimizdiń shyraǵy sóngen joq. Jetisý jurty arda ulyn ardaqtap jatyr jáne bul máńgilik jalǵasyn tabady degen úmittemiz. », - dedi Serik Sarybai.
«Aityńdarshy óldi deýge bolama? Artynda ólmei tuǵyn, óshpei tuǵyn sóz barda».
Belgili jýrnalistiń bul ómirden ótkenine sený qiyn. Onyń qolynyń taby, tabanynyń izi qalǵan jerlerde aǵanyń únin estip, aq didaryn kórip qalatyndai kúi keship júrgen adamzattyń sanynda qisap joq-aý. Munyń qatarynda týǵan-týystarynyń saǵynyshyn jáne qosyńyz.
«Óziniń eńbegimen, meiirimdiliginiń arqasynda elge syily azamat boldy. Artynan ilesip kele jatqan shákirtteri aldaǵy ýaqytta murajaiǵa kelip bir sát aǵany eske alyp turady degen oidamyn. Átteń-ai degen ókinish ishimizde jatyr. Biraq taǵdyrdyń isine tosqaýyl bola almaimyz. «Ornynda bar ońalar» demekshi, qazaqtai el barda Beisen aǵamyzdyń aty óshpeidi», - deidi Beisen Quranbektiń inisi Tólegen Janysbek.
Shara barysynda estelikter aityldy. Kóptiń kóńili bosady. Beisen aǵanyń baqilyq bolǵany óń men tústiń ortasyndaǵy jaǵdai bolǵany anyq. Biraq, kóndikpeske amal joq.
«Jaqsynyń aty ólmeidi, ǵalymnyń haty ólmeidi» degendei, Beisen Quranbektiń aty da, artynan qaldyrǵan jaqut murasy de el jadynda máńgi qalary sózsiz. Oǵan dálel, Jas býyn arasynda eńbek jolyn dáripteý jumystarynyń bastalǵany. Sonyń biri alǵash ret Beisen Quranbek atyndaǵy oblystyq olimpiadanyń ótkizilýi.
...
Beisen Quranbek 1971 jyly 9 jeltoqsanda Almaty oblysy Kerbulaq aýdany Qyzyljar aýylynda dúniege kelgen. Telejúrgizýshi ál-Farabi atyndaǵy Qazaq ulttyq ýniversitetin bitirgen. Eńbek jolyn respýblikalyq «Sport» gazetinde tilshi, jaýapty hatshy qyzmetterinen bastaǵan.
Al, qalǵan jyldaryn qazaq televideniesimen bailanystyryp, «Rahat», «31 arna», «Habar», Prezident teleradiokesheninde qyzmet atqarǵan. 2007-2012 jyldary Almaty oblystyq «Jetisý» telearnasynyń bas direktory boldy. 2013-17 jyldary «Qazaqstan» telearnasyndaǵy jurtqa tanymal «Aitýǵa ońai» áleýmettik-turmystyq tok-shoýynyń júrgizýshisi boldy. 2017 jyldyń qyrkúiek aiynan bastap «Qareket» baǵdarlamasyn júrgizdi. 2014 jyldyń qazan aiynda Almaty oblystyq «Jetisý» telearnasynyń bas direktory bolyp qaita taǵaiyndaldy.
2020 jyldyń 18 mamyrynda sozylmaly syrqattan ómirden ozdy.
