Memleket basshysy Qasym-Jomart Toqaevtyń tapsyrmasyna sáikes «Qazaqstan temir joly» ulttyq kompaniiasynyń vokzal infraqurylymyn jańǵyrtý baǵdarlamasy aiasynda respýblika boiynsha 124 vokzal, onyń ishinde Abai oblysynda 10 vokzaldy jańǵyrtý jumysy bastalǵan bolatyn, dep habarlaidy dalanews.kz.
Búgin Kýrchatov qalasyndaǵy Degeleń temirjol vokzaly tolyq jańartylyp, qaitadan salynyp, saltanatty túrde ashyldy. Sharaǵa oblys ákimi Berik Ýáli qatysty.
Temirjol vokzalyn rekonstrýktsiialaý baǵdarlamasy aiasynda tolyq jóndeýden ótken Degeleń vokzalynyń aýmaǵy 85 sharshy metrden 300 sharshy metrge deiin ulǵaityldy. Ishki keńistik tolyq jańartylyp, kútý zaldary men jolaýshylarǵa qyzmet kórsetý oryndary zamanaýi talaptarǵa sai jabdyqtaldy. Sonymen qatar múmkindigi shekteýli azamattar úshin nysannyń qoljetimdi bolýyna erekshe kóńil bólindi. Jalpy stantsiiada 190 adam eńbek etedi.
Aimaq basshysy jańa keiipke engen vokzaldardyń turǵyndar úshin mańyzy zor ekenin atap ótti.
«Memleket basshysy Qasym-Jomart Toqaev elimizdiń kólik jáne logistika salasynyń áleýetin arttyrýǵa, temirjol infraqurylymyn jańǵyrtýǵa jáne jolaýshylarǵa kórsetiletin qyzmet sapasyn arttyrýǵa erekshe mán berip keledi. Osy mindetterdi iske asyrý maqsatynda Abai oblysynda 10 temirjol vokzalyn jańǵyrtý jumystary qolǵa alynǵan bolatyn. Maýsym aiynda elimizde alǵash bolyp oblysymyzdaǵy eki vokzal, iaǵni, Borodýliha aýdanyndaǵy Aýyl jáne Belaǵash stantsiialary tolyǵymen aiaqtalyp, paidalanýǵa berildi. Jaqyn kúnderi Maqanshy aýdanynda Jalańashkól, Jarma aýdanynda Shar, Jarma, Úshbiik stantsiialarynyń jańartylǵan temirjol vokzaldaryn ashamyz. Semei, Aiagóz qalalary men Aqtoǵai kentindegi temirjol vokzaldaryn qyrkúiek aiynda paidalanýǵa berýdi josparlap otyrmyz. Atalǵan jobalardyń negizgi maqsaty – turǵyndar men jolaýshylarǵa barynsha qolaily orta qalyptastyrý, qaýipsizdik deńgeiin arttyrý jáne temirjol qyzmetin zamanaýi talaptarǵa sáikestendirý. Búgin ashylyp otyrǵan Degeleń vokzaly – osy aýqymdy jumystardyń naqty nátijeleriniń biri. Bul vokzaldyń buryn tar, eski bolǵanyn bilesizder. Qazir aýmaǵy keńeitilip, perrondary uzartylyp, ǵimarat tolyq buzylyp, qaita salynyp, jańa keiipke endi. Jańadan salynǵan vokzal Kýrchatov qalasynyń turǵyndaryna jáne osy óńir arqyly qatynaityn jolaýshylarǵa sapaly ári qolaily qyzmet kórsetetin mańyzdy nysanǵa ainalady dep senemin», – dedi Berik Ýáli.
Temirjolshylar jańa nysannyń ashylǵanyna rizashylyqtaryn bildirdi.
«Osy ýaqytqa deiin jolaýshylarǵa 1957 jyly salynǵan jáne ábden eskirip, halyqqa tiisti deńgeide qyzmet kórsete almaityn nysannyń qolaisyzdyqtaryna tózýge týra keldi. Úkimet pen Abai oblysy ákimdiginiń qoldaýymen ǵimarat adam tanymastai ózgerdi. Jaqyn arada stantsiia turaqty paidalanýǵa jáne halyqqa qyzmet kórsetýge «Magistraldyq jeli» kásipornynyń Semei bólimshesine tapsyrylady. Barshańyzdy búgingi qýanyshty sátpen quttyqtaimyn», – dedi «Qazaqstan Temir joly» UK AQ vokzal sharýashylyq direktsiiasy oblystyq filialy direktorynyń orynbasary Nurlan Ázimhanov.
Stantsiia arqyly «Óskemen-Astana», «Semei-Astana», «Almaty-Pavlodar» jáne «Semei-Aqtaý» baǵyttaryndaǵy jolaýshylar poiyzdary qatynaidy. Degeleń vokzalynyń jańarýy Kýrchatov qalasyn keshendi damytý jumystarymen sabaqtasyp otyr.
Memleket basshysynyń tapsyrmasyna sáikes qala ǵylym qalashyǵy retinde damyp keledi. Sońǵy jyldary qaraýsyz qalǵan turǵyn úilerdi qalpyna keltirý, kóshelerdi jóndeý, aýlalardy abattandyrý, áleýmettik nysandardy jańǵyrtý baǵytynda aýqymdy jumystar atqaryldy. Shkolnaia kóshesindegi qalpyna keltirilgen úiden áleýmettik osal sanattaǵy 30 otbasy baspanamen qamtyldy.
Qalada Belsendi uzaq ómir súrý ortalyǵy men zamanaýi Jastar ortalyǵy ashylyp, №2 mektep jańartyldy. Qalalyq aýrýhana kezeń-kezeńimen jóndelip, jańa meditsinalyq jabdyqtarmen qamtamasyz etilýde. Sonymen qatar Kýrchatovtyń investitsiialyq áleýetin arttyrý maqsatynda qýaty 700 megavatt bolatyn jańa kondensatsiialyq elektr stantsiiasynyń qurylysy bastaldy.
