Tailandtyń Nonthabýri provintsiiasyndaǵy mektepterdiń birinde bolǵan atys saldarynan keminde jeti adam kóz jumyp, 15 adam jaraqat aldy, dep habarlaidy dalanews.kz.
Politsiianyń málimetinshe, qarýly shabýyldy toǵyzynshy synyp oqýshysy jasaǵan. Qaiǵyly oqiǵa aldynda jasóspirim óz úiinde atasy men ájesin atyp óltirgen.
Oqiǵa Bangkok mańyndaǵy Thepsirin mektebinde jergilikti ýaqyt boiynsha tańǵy saǵat 10 shamasynda bolǵan. Kýágerlerdiń aitýynsha, oqýshy mektep ishinde júrip, oqýshylar men muǵalimderge oq jaýdyrǵan.
Qazirgi málimet boiynsha, qaza tapqandar qatarynda shabýyl jasaǵan jasóspirimniń ózi, onyń atasy men ájesi, sondai-aq birneshe muǵalim men oqýshy bar. Zardap shekkenderdiń keminde ekeýiniń jaǵdaiy aýyr dep baǵalanýda.
Reuters agenttiginiń habarlaýynsha, kúdikti oqiǵa ornynda ózine qol jumsaǵan. Politsiia shabýyl kezinde qoldanylǵan 9 millimetrlik tapanshanyń onyń atasyna tiesili bolǵanyn anyqtady.
Oqiǵa kezinde mekteptiń barlyq oqýshylary men qyzmetkerleri evakýatsiialandy.
Qazir quqyq qorǵaý organdary qarýdyń jasóspirimniń qolyna qalai túskenin jáne qaiǵyly oqiǵanyń sebepterin anyqtap jatyr. Tailand biligi qaza tapqandardyń otbasylaryna kóńil aityp, tergeý júrgiziletinin málimdedi.
