Keiingi ýaqytta elimizde qaiyrymdylyq qorlaryna qatysty daý-damai jiilep ketti. 2024 jyly "Biz Birgemiz Qazaqstan" qorynyń negizin qalaýshy Perizat Qairat 3,5 milliard teńgeni jymqyrdy degen kúdikke ilindi. Araǵa uzaq ýaqyt salmai, dál osy aiyppen "Elge kómek" qorynyń jetekshisi Iliias Sárievtiń de ustalǵany belgili boldy. Bul eki oqiǵa qoǵamda úlken talqy týdyryp, qaiyrymdylyq uiymdaryna degen senimdi shaiqaltty. Osy tusta, Májilis depýtaty ári belgili zańger Abzal Quspan atalǵan faktilerge qatysty quqyqtyq baǵa berdi, dep habarlaidy Dalanaews.kz.
"Elge kómek" qorynyń jetekshisi Iliias Sárievtiń ustalýy
Almatyda "Elge kómek" qaiyrymdylyq qorynyń basshysy Iliias Sáriev alaiaqtyq jasady degen kúdikpen ustaldy. Bul aqparatty alǵash bolyp zańger Nursultan Orynbekov áleýmettik jelide jariialady. Ol Sárievke birneshe azamat aryz túsirgenin jazǵan.
"Iliias Sáriev alaiaqtyq áreketterge bailanysty kúdikke ilindi. Bul týraly naqty aqparat kelip tústi. Qazirgi ýaqytta oǵan birneshe azamattan aryz túskeni belgili. Sol aryzdardyń negizinde ustalǵan", – dedi zańger.
Keiin Almaty qalalyq Politsiia departamenti bul aqparatty resmi túrde rastady.
Sáriev áleýmettik jelide ózin "qazaqtyń Robin Gýdy" retinde tanystyryp, túrli kontsertter men qaiyrymdylyq sharalaryn uiymdastyryp kelgen. Instagram paraqshasynda 600 myńnan astam jazylýshysy bar. Al "Elge kómek" qorynyń paraqshasyna 400 myńǵa jýyq adam jazylǵan.
Alaida qordyń resmi tirkelgeni jaily naqty aqparat joq. Zańdy tulǵalar reestrinen atalǵan qordyń ataýy tabylmady.
Perizat Qairat isi: 3,5 milliard teńge jymqyrdy degen kúdik
2024 jyly dál osyndai jaǵdai qaiyrymdylyq uiymdaryna degen senimdi taǵy bir márte shaiqaǵan edi. "Biz Birgemiz Qazaqstan" qaiyrymdylyq qorynyń negizin qalaýshy Perizat Qairatqa alaiaqtyq jasady jáne qylmystyq jolmen kelgen tabysty zańdastyrdy degen aiyp taǵyldy.
Tergeý derekterine súiensek, Qairat 2021–2024 jyldar aralyǵynda qor atynan balalarǵa, Palestinadaǵy qaqtyǵys qurbandaryna jáne sý tasqynynan zardap shekkenderge kómek kórsetý úshin qarajat jinaǵan. Alaida bul qarjy jeke shottarǵa aýdarylyp, avtokólik, jyljymaityn múlik pen qymbat buiymdar satyp alýǵa jumsalǵany anyqtaldy. Keltirilgen zalal kólemi 3,5 milliard teńgege jetken.
"Qaiyrymdylyqty" qalqan etken eki kúdiktige qandai jaza taǵaiyndalýy múmkin?
Májilis depýtaty Abzal Quspannyń aitýynsha, qazirgi qoldanystaǵy zań aiasynda mundai alaiaqtyq isterge tosqaýyl qoiýǵa tolyq múmkindik bar. Zańger Iliias Sáriev pen Perizat Qairattyń isteri qoǵamǵa sabaq bolýy tiis dep sanaidy.
"Eger Sárievtiń kinási Qylmystyq kodekstiń 190-babynyń 4-bóligimen, iaǵni "Azamattarǵa asa iri kólemde materialdyq zalal keltirdi" dep tanylsa, onda oǵan qoldanystaǵy zańnamaǵa sáikes 5 jyldan 10 jylǵa deiin bas bostandyǵynan aiyrý jazasy taǵaiyndalýy ábden múmkin. Ádette, mundai isterde materialdyq zalaldyń kólemi asa iri kólemnen asyp túsip jatady. Sondyqtan osy bappen jaza taǵaiyndalýy yqtimal. Perizat Qairatqa qatysty da dál osyndai jaza qarastyrylýy múmkin", – deidi ol.
Sondai-aq zańger "qaiyrymdylyq" atyn jamylyp jasalatyn alaiaqtyqtyń jiileýine zańnamadaǵy olqylyq emes, baqylaý men basqarýdyń álsizdigi sebep ekenin basa aitty.
"Qylmystyq zańnamada eshteńeni ózgertýdiń qajeti joq. Qylmystyq kodekstiń 190-baby arqyly alaiaqtyq jasaǵandardy jaýapkershilikke tartýǵa bolady. Mysaly, Perizat Qairattyń da isi dál osy bap boiynsha qozǵaldy. Ol keiinnen ustaldy. Sondyqtan arnaiy baqylaý uiymyn ashýdyń nemese jańa zań qabyldaýdyń qajeti joq dep esepteimin. Bul qylmystyq ister búkil Qazaqstanda keńinen talqylanady. Onyń da ózindik tárbielik máni bar. Bolashaqta osyndai qylmys jasaimyn degen azamattarǵa belgili bir dárejede toqtam bolady dep esepteimin", – dep qosty ol.
Abzal Quspan qaiyrymdylyq uiymdarynyń qyzmetin júieli retteý úshin Úkimetke naqty talap qoidy. Zańgerdiń sózinshe, memleket Túrkiianyń tájiribesin úlgi etip alýy tiis.
"Meniń oiymsha, bul bizdiń Úkimettiń álsizdigin kórsetedi. Osydan eki jyl buryn Túrkiiada úlken zilzala boldy. 50 myńǵa jýyq adam qaza tapty. Sol kezde Túrkiiada ortalyqtandyrylǵan bir qor ashylyp, memleket ózi baqylaý júrgizdi. Kómek bergisi kelgen kez kelgen adam sol qorǵa alańsyz aqsha aýdardy. Barlyq qarajattyń esebi berildi. Muqtaj jandarǵa kómekti Úkimet ózi jetkizip otyrdy.
Bizdiń Úkimet te dál osyndai múmkindikke ie. Osy tusta, Túrkiianyń tájiribesin qoldanýǵa bolady. Bul úshin arnaiy zań shyǵarýdyń qajeti joq. Bul jaǵdai bárimizge sabaq bolady. Kómektesemin degen adamdarǵa osyndai senimdi mehanizmder qajet", - dep tolyqtyrdy ol.
Onyń sózinshe, qaiyrymdylyq qorlaryna degen talapty kúsheitý qajet.
"Qoldanystaǵy "Qoǵamdyq birlestikter týraly" jáne "Qoǵamdyq qorlar týraly" zańdar bar. Sol zańdar aiasynda kez kelgen qordy tekserýge bolady. Eger Úkimet qalasa, salyq organdary, qarjylai baqylaý uiymdary arqyly jospardan tys tekseris júrgize alady. Ol úshin azamattardyń aryzyn kútýdiń qajeti joq.
Másele – zańda emes, baqylaýda. Sondyqtan memleket osyndai qoǵamǵa qaýip tóndiretin máselelerde belsendilik tanytýy kerek. Bul kóptegen azamattyń senimin qalpyna keltirýge sep bolady", - dep qosty ol.
