7 qarashada Shekara qyzmeti Shyǵys Qazaqstan oblysy boıynsha departamentiniń merzimdi qyzmettegi áskerı qyzmetshisi qaıtys boldy, - dep habarlaıdy Dalanews.kz.
Aldyn ala málimet boıynsha ólim sebebi – sýısıd.
Polısıa organdary Qylmystyq kodekstiń 105-baby 1-bóligi boıynsha sotqa deıingi tergep-tekserýdi bastady.
Aıta keteıik,jýyrda OKQ brıfıńinde Qazaqstan Qarýly Kúshteri Bas shtaby Uıymdastyrý-jumyldyrý jumysy departamenti bastyǵynyń orynbasary Rýslan Omarov Qazaqstan áskerinde álimjettik joq ekenin málimdedi.
"Qazir áskerde "dedovshına" joq ekenin túsiný kerek. "Dedovshına" uǵymy aǵa jáne kishi shaqyrýshylar arasyndaǵy kelispeýshilikterdi bildiredi. Qazir qarýly kúshter men basqa da áskerı qyzmetterde áskerge shaqyrylýshylardyń bir ǵana ókilderi shuǵyl qyzmet atqaryp jatqanyn eskersek, "dedovshına" týraly sóz qozǵamaýymyz kerek", - dedi Omarov.
Bir ǵana qyrkúıekte áskerı salada birneshe qaıǵyly oqıǵa boldy:
7 qyrkúıekte Mańǵystaý polıgonynda merzimdi áskerı qyzmetshi jaraqat saldarynan kóz jumdy. Jaýyngerdi vzvod komandıri atyp óltirgen. Qaıtys bolǵan sarbazdyń ákesi Qorǵanys mınıstrine beıneúndeý joldady. Qorǵanys mınıstrligi keıinirek kináliler qatań jaýapkershilikke tartylatynyn málimdedi.
16 qyrkúıekte Qazaqstannyń ońtústigindegi Arys garnızonynyń áskerı bóliminiń kelisimshart boıynsha áskerı qyzmetshisi travmatıkalyq qarýdan jaraqat aldy.
19 qyrkúıekte Aıagózde áskerı qyzmetshiniń denesi tabyldy. Áskerı garnızonnyń aldyn ala málimetteri boıynsha ofıser óz-ózine qol jumsaǵan.
22 qyrkúıekte Petropavlda kelisimshart boıynsha áskerı qyzmetkerdiń denesi tabyldy. Bul derek boıynsha qylmystyq is qozǵaldy.
30 qyrkúıekte Aqtaýda dekrettik demalystaǵy áskerı qyzmetshi óz-ózine qol jumsaǵany belgili boldy. Marqum 39 jasta bolǵan, onyń denesi óz páterinde tabylǵan.
Resmı málimetike súıensek, keıingi úsh jylda Qazaqstanda 270 áskerı qyzmetker qaıtys bolǵan, al sońǵy tórt jylda áskerde 86 sýısıd tirkelgen, 20 áskerı adam óz-ózine qol salýǵa oqtalǵan.
Ashyq derekkóz málimetteri boıynsha ólim-jitimniń kóp taraǵan sebepteri: aýrý – 36 paıyz, jol apattarynyń saldary – 24 paıyz, sýısıd – 20 paıyz.
