Májilis depýtaty Nartai Sársenǵaliev premer-ministr Oljas Bektenovke depýtattyq saýal joldap, jumyssyzdyq máselesin kóterdi, dep habarlaidy Dalanews.kz.
Depýtattyń sózinshe, Ulttyq statistika biýrosy 2025 jyldyń birinshi toqsanynda Qazaqstan halqynyń 4,6 paiyzy, iaǵni 451 515 azamat jumyssyz dep kórsetken.
"Buǵan kim senedi? Ár qaladaǵy jumyssyz jandar jinalatyn jetim buryshty, tabaqtai diplommen jumys tappai tabanynan taýsylǵan jas mamandardy bárimiz kórip júrmiz ǵoi.
Meniń qolymda 16 mamyrda basylǵan resmi derek bar, munda Qazaqstan halqynyń sany 20 261 486 adam dep kórsetilgen. Sonyń 11 496 447–si eńbekke qabiletti dep jazylǵan. Iaǵni olar jumys isteýi qajet", - dedi ol.
Onyń sózinshe, Qazaqstanda zeinetaqy jinaǵyna kók tiyn aýdarylmaǵan jáne áleýmettik aýdarymdary múldem joq halyq sany 5 244 664 adamǵa jetken.
"Endeshe Qazaqstanda 11,5 million adam eńbekke qabiletti bolsa, onyń 5,2 millionynda áleýmettik aýdarym múldem joq bolsa, demek azamattarymyzdyń teń jartysy jumyssyz demeske amal bar ma? Jumyssyzdar sany 4,6 paiyz degen derektiń shyndyqqa sáikes kelmeitinine osy dálel emes pe? Sondyqtan eldegi jumyssyzdyqty joiamyz desek aldymen jalǵan málimet berýdi toqtatý kerek! Sonyń saldarynan halyqty jumyspen qamtýǵa arnalǵan baǵdarlamalarǵa berilgen qarajat maqsatsyz jumsalyp jatyr. Oǵan Joǵary aýditorlyq palatanyń esebi dálel. Derek keltireiin, 2024 jyldyń 10 aiynda halyqty jumyspen qamtýǵa arnalǵan sýbsidiialyq 6 baǵdarlamaǵa 180 031 adam qatysypty. Olardyń árqaisyna ai saiyn biýdjetten aqsha tóledik! Sońynda sonyń 26 194-i ǵana turaqty jumysqa ornalasqan", - deidi ol.
Depýtat "Jastar praktikasy" baǵdarlamasyna 2024 jyly 33 300 qazaqstandyq qatysqanyn, baǵdarlama tártibine sáikes olardyń árqaisyna aiyna 117 960 teńge tólengenin málimdedi. Soǵan qaramastan tek 7400 azamat jumysqa ornalasqan.
"Qazir elimizde 5,7 million jas bar, sonyń 3,7 milliony eńbekke qabiletti. Eńbek ministrligi 2024 jyly jastardy jumyspen qamtýǵa arnalǵan baǵdarlamalar arqyly 236 037 jas qazaqstandyqty qyzmetke turǵyzdyq dep esep berdi. Biraq byltyr tek 203 607 jas azamat qana zeinetaqy qoryna aýdarym jasaǵan. Qalǵan 33 myń jastyń áleýmettik tólemderi qaida? Rasynda olar jumysqa turdy ma, joq pa? Álde jastar jalǵan statistikanyń qurbanyna ainaldy ma? Nemese memlekettik baǵdarlama arqyly jastardy áleýmettik aýdarymdar jasalmaityn kúmándi jumysqa turǵyzdy ma jaýapty organdar? Munyń barlyǵy Joǵary aýditorlyq palatynyń esebimen dáleldengen derekter.... Biz ózi kimdi aldap júrmiz sonda?" - dep ashyndy ol.
