Halqy eń jyldam ósip jatqan qalalardyń biri - Shymkentte injenerlik infraqurylymǵa túsetin júkteme jyl saiyn artyp keledi, dep habarlaidy dalanews.kz.
Osy jaǵdaida bilik kommýnaldyq jelilerdi jańǵyrtýǵa milliardtaǵan teńge bólgenimen, turǵyndar úshin basty suraq ózgermeidi: bul jumystar apattar men qyzmet sapasyna qatysty túitkilderdi sheshe ala ma?
Úkimet otyrysynda Shymkent qalasynyń ákimi Ǵabit Syzdyqbekov 2026 jyly elektr, sý jáne jylýmen jabdyqtaý salalarynda jalpy quny 31,1 mlrd teńge bolatyn alty joba júzege asyrylyp jatqanyn málimdedi.
Ákimniń aitýynsha, jumystar jylytý maýsymy bastalǵanǵa deiin aiaqtalýy tiis. Sonyń nátijesinde 88 shaqyrym injenerlik jeli jańǵyrtylyp, 139 myń abonent sapaly kommýnaldyq qyzmetpen qamtylady.
Alaida úshinshi megapolis úshin bul másele jańa emes. Sońǵy jyldary qalada halyq sanynyń kúrt artýyna bailanysty elektr, sý jáne jylý jelilerine túsetin júkteme birneshe ese kóbeidi. Sonyń saldarynan turǵyndar jaz mezgilinde elektr qýatynyń óshýine, sý qysymynyń tómendeýine, al qys mezgilinde jylýmen qamtýdaǵy qiyndyqtarǵa birneshe ret shaǵymdanǵan.
Buǵan qosa, qala aýmaǵynyń keńeiýi men jańa turǵyn úi massivteriniń salynýy injenerlik infraqurylymdy jańartý qarqynynan jyldamyraq júrip jatqany da jii aitylyp keledi.
Sondyqtan biyl qolǵa alynǵan jobalardyń ýaqytynda aiaqtalýy ǵana emes, olardyń qalanyń aldaǵy jyldardaǵy ósip kele jatqan suranysyn qamtamasyz ete alýy da mańyzdy.
Úkimet otyrysynda Almaty oblysyndaǵy jobalardyń júzege asyrylý barysy da qaraldy. Óńirde ulttyq joba aiasynda 62,9 mlrd teńgege 10 joba iske asyrylyp jatyr. Jylý jelilerin rekonstrýktsiialaý biylǵy qarasha aiynyń sońyna deiin aiaqtalady dep josparlanǵan. Sonymen qatar Qonaev qalasynyń sýmen jabdyqtaý júiesi boiynsha qaita jariialanǵan konkýrstardyń nátijesinde jumystardy jyl sońyna deiin aiaqtaý kózdelip otyr. Al 2027 jyly oblysta jalpy quny 23 mlrd teńge bolatyn taǵy 14 joba júzege asyrylmaq.
