Qazaqstanda kiik etiniń naryqtaǵy baǵasy 1600 teńge bolýy múmkin. Bul týraly Aýyl sharýashylyǵy ministrligi málimdedi, dep habarlaidy Dalanews.kz.
Alaida atalǵan soma ázirge tek usynys.
Ministr Aidarbek Saparovtyń aitýynsha, búginde elimizde 18 et óńdeitin kásiporyn jumys istep tur. Bolashaqta kiik etiniń quny logistikalyq shyǵyndar men óndiris protsesine qarai ózgerýi yqtimal.
Eger ministrlik usynǵan baǵa qabyldansa, kiik eti naryqtaǵy eń qoljetimdi et túrleriniń qataryna enýi múmkin. Mysaly, qazirgi tańda:
-
Siyr etiniń kelisi shamamen –3095 teńge,
-
Qoi eti – 3000–3100 teńge,
-
Qus eti – 1496 teńge turady.
Salystyrmaly túrde alǵanda, kiik eti siyr etine qaraǵanda eki esege jýyq arzan bolýy yqtimal.
Eske salaiyq, buǵan deiin Qazaqstanda 800 myńǵa jýyq aqbóken aýlanýy múmkin ekeni habarlanǵan edi. Bul týraly Ekologiia jáne tabiǵi resýrstar ministri Erlan Nysanbaev málimdedi.
“Ǵylymi negizdemege sáikes, búgingi tańda búkil popýliatsiianyń 20 paiyzyn tabiǵi ortadan alý usynylyp otyr. Kóktemgi esep qorytyndysy boiynsha, Qazaqstandaǵy aqbóken sany resmi túrde 3,9 millionǵa jetti. Onyń ishinde 2,3 milliony – Oral popýliatsiiasyna, 1,6 milliony – Betpaqdala popýliatsiiasyna, al 78 myńy – Ústirt popýliatsiiasyna tiesili. Jalpy alǵanda, biz 4 millionǵa jýyq, naqtyraq aitsaq, 3 mln 978 myń dep esepteimiz. Osyǵan sáikes 800 myń aqbókendi atý kózdelip otyr”, — dedi ministr.
Ministrdiń aitýynsha, janýarlardyń jynysy men jasy da naqty belgilengen.
“40% – atalyqtar, 40% – analyqtar, 20% – biyl týǵan tóli. Iaǵni, qazirgi tańda bizde barlyq esep, parametrler naqtylanǵan. Ótken aptada ǵylymi negizdemeni resmi túrde aldyq. Búgin uiymdastyrýshylyq máselelerdi talqyladyq. Bir-eki kún ishinde sheshimimizdi resmi túrde jariialaimyz”, — dedi Erlan Nysanbaev.
Sondai-aq ministr aqbóken etin óńdeýge arnalǵan jeke et kombinaty salynýy múmkin ekenin aitty.
“Munshama kólemde janýar alynsa, etin óńdeý máselesi óte mańyzdy bolmaq. Sondyqtan búgingi tańda biz jergilikti qurylymdarmen birlesip, aqbóken etin qaita óńdeitin et kombinattaryn salý boiynsha investitsiialyq jobalardy pysyqtap jatyrmyz. Qazirgi tańda bul bastamaǵa altyǵa jýyq kompaniia qyzyǵýshylyq bildirdi”, — dedi ol.
