Aqmola oblysynda sot sýrrogat anamen kelisimshart jasasqan erli-zaiyptynyń talabyn ishinara qanaǵattandyrdy. Olar jumsaǵan qarajatyn qaitarýdy jáne moraldyq ótemaqy óndirýdi suraǵan, dep habarlaidy Dalanews.kz.
Sot materialdaryna sáikes, taraptar 2024 jyly eki ret uryqtandyrý rásimin ótkizýge kelisken. Alǵashqy áreket sátsiz aiaqtalǵan soń, erli-zaiypty áielge ekinshi protsedýraǵa daiyndyq úshin 500 myń teńgeden astam qarjy aýdarǵan. Bul qarajat tamaqtaný, meditsinalyq tekserý jáne ózge de daiyndyq shyǵyndaryn óteýge baǵyttalǵan.
Alaida 2025 jyldyń naýryzyna josparlanǵan ekinshi uryqtandyrý rásimi ótpei qalǵan. Sebebi sýrrogat ana belgilengen ýaqytta kelmegen. Keiin erli-zaiypty embriondy ári qarai saqtaýdan bas tartqan.
Birinshi satydaǵy sot jaýapkerden 550 myń teńge materialdyq shyǵyn jáne 500 myń teńge moraldyq ótemaqy óndirý týraly sheshim shyǵarǵan. Degenmen apelliatsiialyq sot bul sheshimge ózgeris engizdi.
Sot sýrrogat ana ekinshi protsedýraǵa daiyndyq úshin alynǵan qarajatty qaitarýy tiis dep tanydy, óitkeni rásim onyń kinásinen júzege aspaǵan.
Al moraldyq ótemaqy óndirý týraly talap qanaǵattandyrylmady. Sot sheshiminde kelisimshartta embriondy saqtaý máselesi qarastyrylmaǵany, sondai-aq ony joiý týraly sheshimdi erli-zaiyptylar óz erkimen qabyldaǵany atap ótilgen. Osyǵan bailanysty sot jaýapker áreketi talapkerlerdiń tek múliktik quqyqtaryna ǵana áser etti degen qorytyndyǵa kelgen.
