Qostanai oblysyndaǵy Beiimbet Mailin aýdany prokýratýrasynyń júrgizgen tekserýi nátijesinde mal azyǵy qunyn arzandatýǵa jáne selektsiialyq jumystardy júrgizýge baǵyttalǵan sýbsidiialardy jymqyrý faktileri anyqtaldy, dep habarlaidy Dalanews.kz.
Anyqtalǵan zań buzýshylyqtar boiynsha aýdan prokýratýrasy Qazaqstan Respýblikasy Qylmystyq kodeksiniń 190-babynyń 4-bóligi 2) tarmaǵy (asa iri mólsherde jasalǵan alaiaqtyq) boiynsha sotqa deiingi tergep-tekserý bastady.
Qylmystyq is Qostanai oblysy prokýratýrasynyń baqylaýymen tergelip, nátijesinde úsh tulǵanyń qylmystyq áreketteri dáleldenip, is sotqa joldandy.
Sottalýshylardyń óz kinásin tolyq moiyndaýyna bailanysty qylmystyq is qysqartylǵan tártippen qaraldy.
2025 jylǵy 4 qyrkúiektegi Beiimbet Mailin aýdandyq sotynyń úkimimen sottalýshylar ár túrli merzimge bas bostandyǵynan aiyrý jazasyna tartylyp, sot zalynda qamaýǵa alyndy.
Sonymen qatar, memleketke keltirilgen materialdyq zalaldy óteý maqsatynda sottalýshylardan 96 million teńgeden astam soma ortaq tártippen óndirildi.
Úkim zańdy kúshine engen joq.
