Qazaqstanda tasqyn sý saldarynan úii men malynan aiyrylǵan azamattarǵa zalaldy óteý jumystary jalǵasyp jatyr, dep habarlaidy Dalanews.kz.
Qyzyl sýdan zardap shekken óńirlerdiń turǵyndarynan 24 835 ótinim qabyldanǵan.
“4 mamyrdaǵy jaǵdai boiynsha 16 168 otbasy 5,7 mlrd teńgeden astam somaǵa 100 AEK mólsherinde birjolǵy tólem aldy. Mal basynyń shyǵyny úshin beriletin tólem 916 mln teńgeden asty. Zardap shekken óńirlerde 4556 úi tekserilip, 2845 nysanda baǵalaý júrgizildi. Jóndeý jumystaryna jáne turǵyn úidi qalpyna keltirýge 696 mln teńgeden astam qarajat bólindi. Atalǵan kómek 530 otbasyn qamtydy”, - dep habarlaidy premer-ministrdiń baspasóz qyzmeti.
Aqmola, Qostanai, Qaraǵandy jáne Pavlodar oblystarynda taǵy 53 otbasyǵa qiraǵan baspananyń ornyna jańa úi men páter berilgen.
“Zalaldy óteý jumystary jalǵasýda jáne úkimettiń qatań baqylaýyna alynǵan. El prezidentiniń tapsyrmasymen barlyq azamatqa jan-jaqty kómek pen qoldaý kórsetiledi”, - dep atap ótti úkimet.
