Ulytaý oblysynda Tabiǵi resýrstar basqarmasynyń basshysyna jáne taǵy birqatar laýazymdy tulǵaǵa qatysty materialdar sotqa jiberildi, - dep habarlaidy Dalanews.kz.
Qarjylyq monitoring agenttigi Ulytaý oblysy Tabiǵi resýrstar basqarmasynyń basshysyna qatysty laýazymdyq ókilettigin teris paidalaný deregi boiynsha, sondai-aq, "Jezdi ózenin sanatsiialaý" jobasy sheńberinde tiisti túrde jumys atqarmaǵan tulǵalarǵa qatysty qylmystyq isterdi aiaqtady.
Tergeý barysynda qurylys normalary oryndalmaǵany, jobalaý qujattamasynan aýytqýlarǵa jol berilgeni anyqtaldy, bul jobalaýshy málimdegen ózenniń sý kóleminiń ótkizý qabiletin azaitty.
Oblystyń tabiǵi resýrstar basqarmasynyń basshysy is júzinde jasalmaǵan jumystardyń aktilerine qol qoiǵan. Qurylys nysanyna barmastan tehnikalyq jáne avtorlyq qadaǵalaýshylar da oryndalǵan jumystardyń aktilerine qol qoiyp bergen.
"Laýazymdy tulǵalardyń osy qylmystyq áreketteri biyl kóktemde tótenshe sý tasqyny kezinde 10 jeke úidiń sýǵa ketýine ákep soqty. Sý tasqyny kezinde Ulytaý oblysy Jezdi kentindegi 24 jeke úiden 108 adam, onyń ishinde 56 bala evakýatsiialandy", - dep jazylǵan habarlamada.
Qylmystyq istiń materialdary sotqa jiberildi.
