Aqmola oblysyndaǵy Býrabai kóline barǵan demalýshylar sýdyń lastanǵanyn aityp dabyl qaqty. Olardyń sózinshe, sýǵa túsken kezde ótkir jaǵymsyz iis sezilip, tipti nájis qaldyqtary da baiqalǵan, dep habarlaidy dalanews.kz.
Sinegor.kz málimetinshe, oqiǵa Býrabaidaǵy shipajailardyń birine qarasty jaǵajaida bolǵan.
Jelide taraǵan jariialanymǵa pikir qaldyrǵandardyń birqatary mundai jaǵdaidyń alǵash ret emes ekenin aityp, Býrabai kóline shomylmaityndaryn jazǵan. Keibir qoldanýshylar muny káriz jáne tazartý júieleriniń jai-kúiimen, sondai-aq qoǵamdyq dárethanalardyń jetkiliksizdigimen bailanystyrǵan.
Aita keteiik, keiingi ýaqytta týrister Býrabai kýrorttyq aimaǵyndaǵy sanitarlyq jaǵdaiǵa qatysty shaǵymdaryn jii jariialap júr. Buǵan deiin de demalýshylar jaǵajailardyń tazalyǵy, jaǵymsyz iis pen qoǵamdyq dárethanalardyń tapshylyǵy máselesin kótergen.
Al Aqmola oblysynyń ákimdigi buǵan deiin kýrort aýmaǵyndaǵy jekelegen sanitarlyq máselelerdi ruqsatsyz jumys isteitin kásipkerlerdiń qyzmetimen bailanystyrǵan.
Óz kezeginde Býrabai memlekettik ulttyq tabiǵi parkiniń ákimshiligi tabiǵatty qorǵaý talaptaryna bailanysty kól jaǵalaýyn tolyqtai dárethanalarmen jabdyqtaý múmkin emestigin málimdegen. Sondai-aq mamandar demalýshylarǵa sý sapasy turaqty baqylanatyn resmi jaǵajailarda ǵana shomylýǵa keńes bergen.
