BUUDB-nyń bul bastamasy kómirdi birtindep aýystyrý maqsatynda neǵurlym taza, balamaly otyn túrlerin endire bastaýǵa baǵyttalǵan. Bastama sonymen qatar genderlik aspektige ie jáne áielderdiń energiia resýrstaryna qoljetimdiligin jaqsartýǵa, sondai-aq olardyń quqyqtary men múmkindikterin keńeitýge baǵyttalǵan.
«Áielderdiń klimattyń ózgerýine qarsy kúrestegi mańyzdy róline qaramastan, áielder klimattyq saiasat pen belsendi bastamalardan kóbinese shet qalýda. Barlyq deńgeidegi klimattyń ózgerýine qarsy kúreste áielderdiń tolyqtai jáne tiimdi qatysýynsyz, sondai-aq kóshbasshylyǵynsyz ádil energetikalyq aýysýǵa qol jetkizý múmkin emes», – dep atap ótti Qazaqstandaǵy BUUDB Turaqty ókiliniń orynbasary Sýhrob Hodjimatov.
Grant alýshylar Soltústik Qazaqstan oblysynyń eki kásiporny, iaǵni «Asia Wood's» JShS jáne «Jaqypov» ShQ boldy. Kásipkerler aýyl sharýashylyǵy men aǵash óńdeý qaldyqtaryn paidalana otyryp, otyn briketterin shyǵarýdy josparlap otyr. Óndiristik jeliler iske qosylǵannan keiin kásipkerler halyqtyń áleýmettik osal toptaryna otyn briketterin tegin taratady. BUUDB granttary qajetti jabdyqty satyp alý jáne ornatý shyǵyndaryn ishinara óteýdi kózdeidi.
Qazaqstanda jyl saiyn kommýnaldyq-turmystyq qajettilikterge shamamen 11,3 million tonna kómir paidalanylady. Qatty otyndy paidalaný aýyr metaldar men parniktik gazdardyń shyǵarylýyna alyp keledi. Otyn briketterine aýysý bul shyǵaryndylardy edáýir azaitady.
Aýylsharýashylyq qaldyqtaryn biomassa retinde paidalaný – jylýmen qamtamasyz etýdiń balama tehnologiiasy bolyp tabylady. Aýylsharýashylyq qaldyqtarynan alynǵan biomassanyń birneshe artyqshylyǵy bar: janý kezinde ziiandy zattar bólinbeidi, is júzinde
tútin bolmaidy jáne kómirmen salystyrǵanda kúldiń paiyzy aitarlyqtai tómen. Dándi daqyldardyń qolda bar saban qoryn, sondai-aq aǵash óńdeýdi damytýdy eskere otyryp, Qazaqstanda osyndai óndiris úshin úlken shikizat bazasy bar ekendigin kórýge bolady.
«Soltústik jáne Shyǵys Qazaqstanda aýyl sharýashylyǵy salasy men aǵash óńdeý qaldyqtarynyń jetkilikti kólemi bar. Qazaqstanda otyn briketterin jasap shyǵarýdyń qolda bar áleýeti boiynsha kórsetkishterge súiene otyryp, eldegi otyn briketterin jasap shyǵarýdy damytýdyń áleýmettik jáne ekologiialyq tiimdiligin atap ótý qajet. Qazaqstanda biootyn óndirýge barlyq qajetti múmkindikter bar», – dep atap ótti QR «Atameken» Ulttyq kásipkerler palatasynyń
AÓK jáne tamaq ónerkásibi departamentiniń basqarýshy direktory Erken Naýryzbekov.
