Shyǵys Qazaqstan oblysynyń taýly aimaqtarynda sel qaýpi kezeńi bastaldy. Bul týraly óńirlik Tótenshe jaǵdailar departamenti málimdedi, dep habarlaidy dalanews.kz.
Mamandardyń sózinshe, óńirde sel júrýi yqtimal 13 ózen basseini bar. Olar Zaisan, Katonqaraǵai aýdandarynda, sondai-aq Ridder qalasy men Altai aýdanynda ornalasqan. Jalpy sany 144 morenalyq kól 13 sel oshaǵyn qalyptastyryp otyr. Bul 11 eldi mekenge qaýip tóndirýi múmkin.
"Qazseldenqorǵaý" mekemesiniń mamandary sel kóbine nóserli ári uzaq jaýyn-shashynnan keiin nemese kúshti jer silkinisi bolǵan jaǵdaida júrýi múmkin ekenin eskertti.
Sel qaýpi kezeńinde qaýipsizdikti qamtamasyz etý úshin 15 mamyrdan bastap oblysta maýsymdyq toǵyz gidrobeket jumysyn bastaidy. Budan bólek, Katonqaraǵai aýdanyndaǵy Sarymsaqty ózeninde jyl boiy jumys isteitin bir gidrobeket baqylaý júrgizedi.
Gidrobeketterden táýligine úsh ret sel qaýpi bar aýmaqtardaǵy gidrometeorologiialyq jaǵdai týraly aqparat berilip otyrady.
TJD men "Qazseldenqorǵaý" óńir turǵyndary men týristerge sel jáne kóshkin qaýpi bar taýly aimaqtarǵa barýdan ýaqytsha bas tartýǵa keńes berdi. Tótenshe jaǵdai týyndaǵan jaǵdaida 112 nómirine habarlasý qajet.
