Shyǵys Qazaqstan oblysynda jyl basynan beri qos azamattyqqa qatysty zań talaptaryn buzǵan ondaǵan derek anyqtaldy. Sot sheshimimen shetel azamattyǵyn alǵan 6 adam Qazaqstan aýmaǵynan shyǵaryldy, dep habarlaidy dalanews.kz.
Oblystyq politsiia departamentiniń málimetinshe, biyl 450-den astam adam Qazaqstan Respýblikasynyń azamattyǵynan aiyrylǵan. Olardyń basym bóligi kórshi memlekettiń azamattyǵyn alǵan.
Zań talaptaryn saqtamaǵany úshin 31 adam ákimshilik jaýapkershilikke tartyldy. Onyń ishinde 24 azamat shetel azamattyǵyn alǵany týraly ishki ister organdaryna ýaqytyly habarlamaǵan. Al 7 adam Qazaqstan azamattyǵynan aiyrylǵanyna qaramastan, eldiń jeke basyn kýálandyratyn qujattaryn zańsyz paidalanǵan. Osy quqyq buzýshylyqtarǵa bailanysty sottyń sheshimimen 6 shetel azamaty Qazaqstan aýmaǵynan shyǵaryldy.
Anyqtalǵan jaǵdailardyń biri Óskemen qalasynyń 43 jastaǵy turǵynyna qatysty boldy. Ol 2024 jyldyń qazan aiynda basqa memlekettiń azamattyǵyn alǵanymen, zańda belgilengen merzimde bul týraly ishki ister organdaryna habarlamaǵan. Sonyń saldarynan Qazaqstan azamattyǵynan aiyrylyp, qujattary tárkilendi.
Politsiia departamenti azamattarǵa ózge eldiń azamattyǵyn alǵan jaǵdaida 30 kún ishinde bul týraly ishki ister organdaryna habarlap, Qazaqstan Respýblikasynyń azamattyǵyn rastaityn qujattardy tapsyrý mindetti ekenin eske saldy. Vedomstvonyń málimetinshe, bul talapty oryndamaǵandarǵa ákimshilik jaýapkershilik kózdelgen.
