Bloger, Májilis depýtaty Dáýlet Muqaevtyń basy daýǵa qaldy. Bul joly 200-den asa halyq onyń jarnamasyna senip, "baspanasyz qalǵandaryn" jetkizip otyr, - dep habarlaidy Dalanews.kz.
Másele "Astarly aqiqat" baǵdarlamasynda kóterildi. Mah Bet-ten zardap shekken júzdegen adamnyń sózinshe, kompaniiany ánshi Tóreǵali Tóreáli, ázilkesh Nurbolhan Sharapov, depýtat Dáýlet Muqaev jarnama jasaǵannan keiin ǵana senip, baryn bergen. Al endi qonys toi jasaimyz dep kútkender turǵyn úi kesheniniń salynbaǵanyn bilgen.
"2022 jyly tamyzda 200-den asa adam Maxbet PV2-ge salymshy retinde aqsha salǵan bolatynbyz. Jalpy soma áli belgisiz, biraq 2 mlrdtan asa soma salyndy", - deidi salymshylardyń biri Meiir Altynbekuly.
Al bul qurylys Almatydaǵy zańsyz qurylys tizimine engen bolyp shyqty.
"Dáýlettenniń sózine erip, kompaniiaǵa baryp, aqshamdy salyp edim. 10 millionnan asa aqsha saldym", - deidi Aijamal Baisaqalova.
Salymshylar úidi byltyr alýy kerek bolǵan.
"Topta 224 salymshy bar. Ol jerde bári bilimdi, oqyǵan. Biraq solardyń 80-90 paiyzy Dáýlettenge sendi. Ol kezde depýtat bolǵan joq, bloger boldy. Nege ol kisige sendi? Sebebi paraqshasynda "Ár qazaq baspanaly bolsyn" dep kýrs satatyn", - deidi taǵy bir salymshy.
Jarnamada depýtat úi 2023 jyldyń aiaǵynda bitetinin, "Dáýletten" dese, tipti "18 aiǵa deiin bólip tóleýge bolatynyn" aitady.
Dese de aiyptalyp otyrǵan kompaniia ókili Muqaevtan jarnama alý úshin qyrýar qarjy jumsaǵandaryn jetkizdi.
