Sotqa aryzdanǵan muǵalim jeńiske jetti
Azattyq tilshisiniń habarlaýynsha, sýdia Aigúl Jańbyrbaeva Saǵidýllaevanyń shaǵymyn qanaǵattandyryp, mektep direktorynyń muǵalimge "pedagogikalyq ádep saqtamady" dep bergen eskertýiniń kúshi joiylsyn degen sheshim shyǵardy. Sýdia sheshimdi qysqasha ǵana oqydy.
Sot sheshimi shyqqan soń Azattyq tilshisi direktor Núsipbekovanyń sheshimge qatysty pikirin bilmek bolǵan. Biraq Núsipbekova sheshimdi "Talqylaýǵa jatpaidy" dep qysqa qaiyrdy.
Aiman Saǵidýllaeva sot sheshimine riza ekenin bildirdi.
Almaty oblysy Qarasai aýdany Jańaturmys aýyly mektebinde qazaq tili páninen sabaq beretin muǵalim Aiman Saǵidýllaeva 2015 jyly mektep ustazdaryna tikelei mindetterinen basqa da artyq jumystar júkteletini jóninde másele kóterip tanylǵan edi. Onyń áleýmettik jelidegi jazbalary men BAQ-taǵy maqalalarynan keiin áleýmettik jeli qoldanýshylary sol tustaǵy bilim jáne ǵylym ministri Aslan Sárinjipovti muǵalimany qýdalaýdy toqtatýǵa yqpal etýge shaqyryp, ashyq hat jazyp, qol jinaǵan.
Aiman Saǵidýllaeva biyl mamyrdyń 19-ynda mektep direktory Bekjan Núsipbekovanyń ózine «ádep saqtamaǵany úshin» bergen eskertýimen kelispei, sotqa shaǵymdanǵan. Eskertý «2016 jyly mamyrdyń 19-y kúni mektep aiasynda Raiymbek okrýginiń aqsaqaldar keńesi músheleriniń kezekten tys kezdesýi barysynda pedagogikalyq ádep qaǵidalaryn saqtamaǵany úshin» berilgen. Saǵidýllaeva sottan ol eskertýdi zańsyz dep tanýdy suraǵan.
Derekkóz: "Azattyq"
