Májilis depýtaty Jarqynbek Amantaiuly mektep bitirý keshterin ótkizýdiń biryńǵai tártibin engizýdi usyndy, dep habarlaidy dalanews.kz.
Onyń aitýynsha, biyl oqý jylyn 3,9 millionnan asa oqýshy aiaqtasa, olardyń 215 myńnan astamy - mekteppen qoshtasqan túlekter. Depýtat mektep bitirý rásimi bilimge qurmet pen ustaz eńbegin baǵalaityn mańyzdy mereke bolýy kerek degen pikirde. Alaida depýtat keiingi jyldary bul shara tárbielik máninen alystap, artyq sán-saltanat pen áleýmettik básekeniń kórinisine ainalyp bara jatqanyn aitty.
Ol biyl mektep bitirýshilerge arnalǵan úlken gúl shoqtary men qymbat syilyqtar jarysy qoǵamda qyzý talqylanǵanyn atap ótti. Áleýmettik jelilerde júzdegen gúlden jasalǵan kompozitsiialar men qymbat syilyqtar qalypty qubylys retinde kórsetilgen.
"Biyl qoǵamda erekshe talqylanǵan taǵy bir qubylys: mektep bitirýshi túlekterge arnalǵan alyp gúl shoqtarynyń jarysy boldy. Áleýmettik jelide júzdegen gúlden quralǵan kompozitsiialar, qymbat syilyqtar men saltanatty rásimder qalypty jaǵdai retinde kórsetildi. Ókinishke qarai, mundai báseke kóptegen otbasyǵa aýyr psihologiialyq jáne qarjylyq qysym túsirgeni anyq. Keibir ata-analar balasy qatarynan qalmaýy úshin qaryz alýǵa, bólip tóleýge gúl nemese syilyq alýǵa májbúr bolǵany ashyq aitylyp jatyr. Bul jaǵdai áleýmettik jaǵdaiy tómen otbasynyń balalary arasynda psihologiialyq turǵyda ońai bolmaityny belgili", - dedi ol.
Osy tusta Jarqynbek Amantaiuly mektep bitirý is-sharalaryn ótkizýdiń biryńǵai tárbielik standartyn ázirleýdi usyndy.
