Tólqujat aýystyrǵandardyń kópshiligi kórshi Reseiden qonys tapqan. Sońǵy 3 jylda Qazaqstannan Reseige 135 myń adam birjolata kóship ketipti. Bul Kókshetaý men Ekibastuz sekildi kishigirim qalalardyń halqyna para-par kórsetkish.
Kóshi-qon máselelerin zertteýshi Irina Chernyhtyń aitýynsha ketip jatqandardyń 30 paiyzy oqyp-toqyǵan azamattar. Al 25 paiyzynyń jas mólsheri áli 30-ǵa da jetpepti.
"Ketip jatqandardyń kópshiligi osy elge áli de bereri mol, básekege beiim jurt. 30-ǵa deiingi tepse temir úzetin jastar Qazaqstanda qalýdy jón kórmei, Resei ketip jatyr", – deidi ol.
Reseidiń Ishki ister ministrliginiń dereginshe Qazaqstannan kóship barǵan 50,4 myń adam alǵashqy jylda-aq azamattyq alyp úlgeripti. Al 63,3 myń adamǵa osy elde emin-erkin júrip-turýǵa arnaiy ruqsat berilgen eken.
Buǵan sáikes bir ǵana byltyrǵy 114 myń adam atajurtyna oralǵan.
Alaida Irina Chernyhtyń pikirinshe shemodanyn býyp-túiip otyrǵan orystar ǵana emes, qazaqtar arasynda da alaburtqan azamattar kóp.
"Qazirgi kóshi-qon burynǵydai ulttyq máselege tirelip turǵan joq, onyń áleýmettik sebepteri barshylyq. "Strategiia" qorynyń zertteýinshe árbir 10-shy qazaqstandyq osy elden ketkisi keledi, kóshkisi keletinderdiń ishinde árbir 3-shi adam qazaq.
Reseidiń ózinde qazaqtardyń sany jyl saiyn ósý ústinde. Qazir bul elde turatyn qazaqtar sany 800-900 myńnyń ústinde", – deidi ol.
Al Reseige qonys aýdarǵandardyń basym bóligi bul eldegi ómir súrý deńgeii Qazaqstanǵa qaraǵanda kósh ilgeri dep sanaidy eken.
"Eń bastysy - jalaqysy kóp, bilim sapasy da bizge qaraǵanda ozyq, ári qoljetimdi. Áleýmettik liftimen kóteriletin múmkindik tamyr-tanysqa bailanyp qalmaǵan. Reseige kóshkenderdiń kópshiligi osyny nazarǵa alady.
Ázir Reseide Qazaqstannan kelgen 70 myńǵa jýyq eńbek migranty bar. Beiresmi málimetke qaraǵanda olardyń sany 100 myńnan asyp jyǵylady", – deidi Irina Chernyh.
Sarapshy osy arada Reseide oqyp jatqan jastar týraly da sóz qozǵapty.
"Reseide Qazaqstannyń 52,9 myń azamaty bilim alýda. Bul osydan 8 jyl burynǵy kórsetkishten 267 paiyzǵa kóp.
Bizdiń zertteýimiz boiynsha Reseide bilim alyp jatqan árbir ekinshi stýdent osy elde birjolata turaqtap qalǵysy bar. Sebebi ómir súrý deńgeii Qazaqstanǵa qaraǵandy joǵary. Olar Reseidi óz múmkindigin pash etetin alań retinde qarastyrady", - deidi ol.
