Ákimdikterdi bylai qoiyp, qazir ár mekteptiń óziniń KVN komandasy bar. Mektep oqýshylary qysy-jazy el aralap, arzan ázilderin aityp júrgeni. Sonda olar qai ýaqytta sabaq oqidy? Túsiniksiz. Eń ókinishtisi, mektep direktorlarynan «oqýshylardyń tárbie jumysy qalai júrip jatyr?» dep surai qalsańyz:
– Mektep qabyrǵasynan qurylǵan «Qisyqbai» degen KVN komandamyz aýdandyq, respýblikalyq jarystarǵa qatysyp, júldedi oryndarǵa ie boldy, – dep direktor jorǵalai jóneledi.
Budan keiin «Eki juldyz» jobasy boiynsha saiys ótkizip, úzdik juptardy anyqtaǵandaryn maqtanyshpen eske alatynyn qaitesiń.
Bilim ordalaryndaǵy «Eki juldyz» jobasynyń ózi tárbiege qaishy dúnie emes pe? Baiqaýdyń sońǵy synaǵynda birneshe jup (balalar men qyzdar) ortaǵa shyǵyp, jerde jatqan gazetterdiń aýmaǵynan shyqpai bileýi shart. Ár áýen aiaqtalǵanda gazet búktele beredi. Eń sońynda jigitter qyzdardy qushaqtap, kóterip bileidi. Osylaisha gazettiń ústinde bir-birimen janasyp, uzaq bilegen jup jeńimpaz atanady. Mundaida oqýshylardyń ysqyryǵy men aiqai shý qulaqty jaryp jibere jazdaidy («qyzýqandy «pýblikany» mektep qabyrǵasynan daiyndap jatyrmyz ǵoi).
Muny kórgende ózińdi túngi klýbtardaǵy keshterde júrgendei sezinesiń.
Keibir qyz balalar qysylyp, biden bas tartýǵa tyrysqanymen, elirip alǵan balalarymyz órshelenip, qyzdy qolynan túsirmei bileidi. Osylaisha gazet ústinde bilegen eki jas qara terge malshynady.
Budan keiin jeńimpazdardy marapattaý sharasy bastaldy. Sońynda mektep ishindegi qurmet taqtasyndaǵy «Bizdiń maqtanyshtarmyz» degen jerge juldyzdy juptyń saiys kezindegi fotosy bir jyl boiy ilýli turady.
Al osydan tárbiege qatysty bir jaitty taýyp kórińizshi? Eshteńe joq. Qaita keri tárbie berý baiqaityn shyǵarsyz. Besikten beli shyqpaǵan jastardy jynystyq qatynastarǵa itermelep ne tabamyz? Bul endi «Eki juldyz» jobasynyń bilim berý salasyndaǵy jetilgen túri.
Sodan keiin tárbie isine jaýapty jandardyń bir-biriniń aýyzyna túkirip qoiǵandai mynadai áńgime aitatynyn biletin shyǵarsyz?
"Jastardyń qoly bos kezinde KVN oinap, temeki shekpei araq ishpei jaman qylyqtan boiyn aýlaq salady", dep áńgime aitatyny bar.
Menińshe osy "replikany" qoiatyn kez jetti. Sonda kvnchikterdiń bári ózin-ózi ustai almaityn adam bolǵany ma? Qoly bos jastar KVN-men ainalyspasa temeki shigip, ishkilikke salynyp ketedi degen ne sóz? Ainalysam degen adamǵa sharýa kóp emes pe?
KVN-ǵa qatysýyshalyr aýyrdyń asty, jeńildiń ústimen júrýge beiimdelgender ǵoi. Olardyń yrjalaǵynan memleketke bir tiynda paida joq. Al mal baǵyp, shóp shaýyp, ǵylymmen ainalysqan jastardyń memleketimizge myń san paida keltiredi.
Qaita sabaqtan qalyp, KVN oinap, toi jaǵalaǵandar ishkilikke jaqyn bolatynyn esten shyǵarmaǵan abzal. Sondyqtan KVN jastardy jaman ádetten alastatýshy dep ózimizdi aldamai-aq qoialyq. Qajet bolsa osy KVN-di jaman qylyqtardyń qataryna jatqyzyp qoiatyn kez jetti.
Nurlan Jumahan
https://dalanews.kz/29622
