Qarjy naryǵyn retteý jáne damytý agenttigi (QNRDA) Solva mikroqarjy uiymynyń bankke ainalýyna ruqsat bermedi. Onyń ústine quzyrly vedomstvo atalǵan MQU-nyń jeke iri aktsionerleri Aleksandr Dýnaev pen Boris Batinge sol banktiń iri aktsiialaryn satyp alýyna da ruqsat etpedi, dep jazady Dalanews.kz.
Agenttik qabyldaǵan bul sheshimderine ne sebep ekenin naqtylmady.
Aita ketsek, qyrkúiek aiynda aktsionerler Solva-ny 7,4 mlrd teńgege qosymsha kapitaldandyrdy. Jyl basynan beri olar kompaniianyń jarǵylyq kapitalyn 11,8 mlrd teńgege tolyqtyryp, ony 22,7 mlrd teńgege deiin jetkizdi. Bul Solva-ny bankke ainaldyrý aiasynda jasalǵan is-sharalar boldy. Sondyqtan Solva 2025 jyly bank litsenziiasyn alýy múmkin ekeni aitylyp júr. Alaida bul maqsattyń tez oryndala qoiatyn túri joq sekildi.
Solva Group Ltd. bas direktory Konstantin Barabanov quzyrly vedomstvonyń teris sheshimine qatysty pikir bildirdi.
"BAQ ókilderi men áriptesterimizdiń bizdiń jaǵdaiymyzǵa kóńil bólip, qoldaý bildirip jatqandary úshin alǵys aitamyz! Bul jumysymyzdaǵy qalypty jaǵdai – retteýshi organ qujattardy zańnamada belgilengen merzimde qarastyrady, eger ótinim bergen tarap, iaǵni biz, barlyq eskertýlerdi der ýaqytynda rettep úlgermesek, retteýshi organnyń ótinishimizdi qabyldamaýdan basqa amaly joq. Degenmen bizdiń EDB-ǵa ainalýǵa qatysty josparymyz ózgergen joq, qujattardy rettep, jaqyn arada ótinishiti qaita joldaimyz", — dedi ol.
KASE málimetinshe, 2024 jylǵy 1 qazandaǵy jaǵdai boiynsha "Onlain Qazqarjy" MQU aktsiialarynyń 75%-y "SOLVA CAPITAL" JShS-ǵa, 13%-y SOLVA Group LTD jekemenshik kompaniiasyna, 12%-y Neo Crystal Holdings Ltd jekemenshik kompaniiasyna tiesili. "Boris Batin men Aleksandr Dýnaev MQU-daǵy eń iri úlesterge ie", delingen MQU-nyń 2023 jylǵy aýdit esebinde.
