Qostanai oblysynda politsiia jol jiegine túsip ketken 9 kólikti shyǵardy, dep habarlaidy Dalanews.kz.
Qostanai qalasynda, sondai-aq Qostanai, Meńdiqara jáne Fiodorov aýdandarynda tańerteńnen bastap qar aralas jańbyr jaýdy. Aýa raiy jol apattaryna sebep bolǵan.
"Aýa raiy nasharlaýyna bailanysty patrýldik politsiia qyzmetkerleri kúsheitilgen qyzmet tártibine kóshti. Erekshe nazar Qarabalyq aýdanyna baǵyttalǵan KAZ-03 Qostanai – Almaty – Ekaterinbýrg respýblikalyq tasjolyna aýdaryldy. Tańǵy saǵat 6:00-den 10:00-ge deiin jol shetindegi saidan toǵyz kólik shyǵaryldy", - dedi IIM ókilderi.
Máselen joldyń bir ýchaskesinde Alphard jáne Volkswagen kólikteriniń júrgizýshileri rólge ie bola almai, joldan shyǵyp ketken.
Budan bólek politsiia qyzmetkerleri qatty jel kezinde kólikterdi aǵashtarǵa jaqyn qoimaýǵa shaqyrdy. Tek búginniń ózinde politsiiaǵa osyndai 10 habarlama túsken. Mysaly Abai dańǵylyndaǵy turǵyn úi aýlasynda Exeed kólikke aǵash qulaǵan. Osyǵan uqsas jaǵdai Pavlov kóshesinde de bolyp, JAC kóligine ziian keltirgen. Eki jaǵdaida da keltirilgen shyǵynǵa baǵa berilip jatyr.
"Qala ishinde, jaiaý júrginshiler ótkelderine jaqyndaǵanda jyldamdyqty azaitý, araqashyqtyqty saqtaý, kúrt manevr jasamaý qajet. Al trassada jyldamdyqty asyrmaý usynylady", - dedi IIM ókilderi.
