Qýandyq Bishimbaevqa qatysty sot otyrysynda kózge túsken reseilik jýrnalist Kseniia Sobchaktyń Saltanat Núkenovanyń ólimine qatysty shyǵarylymy jaryq kórdi, - dep habarlaidy Dalanews.kz.
Sobchak Qazaqstandaǵy sot otyrysyn reseilik sot protsesterimen salystyrdy. Ol Qazaqstandaǵy protsess ashyq túrde ótkenin jáne mundai úrdis reseilik protsesterde joǵyn aitady.
Sobchak 1,5 saǵatqa sozylǵan reportajyn sot protsesinde kórsetilgen videolardan bastaǵan.
"Galereiada sýdia Saltanat mert bolarynyń aldynda túsirilgen videolardy kórdi. Bizge videony kórsetpegenimen ondaǵy daýystardan bári túsinikti boldy", - deidi jýrnalist.
Odan bólek, Saltanattyń qurbysy Aida Ahmedina men aǵasy Aitbek Amangeldi 2023 jyly 8 qarashada bolǵan jaittar týraly aityp bergen. Sol túni Bishimbaev pen Núkenova Saltanattyń qurbysy Aidamen reseilik ánshiniń kontsertine barǵan bolatyn.
Bishimbaevpen 14 jyl birge turǵan áieli Nazym Qaharman da suhbat bergen.
"Ekinshi balamyz ómirge kelgen kezde abiýzer ekenin bildire bastady. Sol kezde maskalar sheshile bastady. Iaǵni dóreki bir nárse aityp jiberýi múmkin, ol úshin keshirim suramaityn da. (...) Qýandyq úilenetin kezde maǵan aitty. Bul jaǵdaida balalardy da daiyndai bastadyq. Úshinshi nekesinde baqytty bolatyn shyǵar dep oiladym", - deidi Nazym Qaharman.
Advokat Janna Orazbahova reseilik jýrnalistke bergen suhbatynda Bishimbaev ne úshin alqabilerdi tańdaǵanyn túsindirip bergen.
"Óitkeni Bishimbaev buryn asa aýyr qylmys jasaǵany úshin sottalǵan bolatyn. Al endi bul qylmysy da asa aýyr qylmys bolyp sanalady. Iaǵni, Qazaqstan Respýblikasynyń zańnamasy boiynsha asa aýyr qylmysty qaitalap jasaǵandarǵa ómir boiyna bas bostandyǵynan aiyrý qarastyrylǵan. Iaǵni, Bishimbaev sot ony ómir boiyna bas bostandyǵynan aiyrýy múmkin ekenin túsindi. Al alqabiler sheshimimen onyń jazasy azaiýy múmkin. Sebebi ómir boiyna sottalýy úshin 10 alqabidiń bári qoldap daýys berýi kerek", - deidi advokat Orazbahova.
Sonymen qatar, Orazbahova Bishimbaev qansha jylǵa sottalýy múmkin ekenin aitty.
"Qylmystyq quqyqtyń belgilengen normalaryna sáikes 15 jyldan ómir boiyna deiin sottalýy múmkin", - deidi advokat.
Eske salaiyq, buǵan deiin reseilik bloger Natalia Greis te Qazaqstanǵa kelip, Bishimbaevtyń ata-anasynan suhbat alǵan bolatyn. Bishimbaevtyń anasy Álmira Bishimbaeva ulyn "ana retinde qolynan kelgenshe qorǵap júrgenin" aityp, kózine jas aldy. Sonymen qatar, Ýálihan Bishimbaev ta ulynyń isine qatysty pikir bildirdi.
Odan bólek, Álmira Bishimbaev uly Saltanatty óltirý oiy bolmaǵanyn aitty.
