Joǵary aýditorlyq palatada ǵylymdy damytý salasyndaǵy memlekettik aýdittiń qorytyndysy qaraldy, dep habarlaidy Dalanews.kz.
Memlekettik aýditorlar ǵylymdy damytýǵa bólingen biýdjet qarajatynyń qanshalyqty tiimdi paidalanylatynyn tekserdi. Aýdit nátijeleri QR Joǵary aýditorlyq palatasynyń otyrysynda qaraldy.
Talqylaýǵa Ǵylym jáne joǵary bilim ministri Saiasat Nurbek, ministrliktiń jaýapty laýazymdy adamdary, vedomstvolyq baǵynysty uiymdardyń basshylary jáne basqa da múddeli memlekettik organdardyń ókilderi qatysty.
Júrgizilgen aýdit odan ári jetildirýdi talap etetin baǵyttardy anyqtaýǵa múmkindik berdi. Olardyń qatarynda strategiialyq josparlaý, negizgi institýttardyń qyzmeti jáne salany normativtik retteý bar.
Máselen, ǵylymdy qarjylandyrý kóleminiń 219 mlrd teńgege deiin ósýine qaramastan, ǵylymi zertteýler men tájiribelik-konstrýktorlyq jumystarǵa (ǴZTKJ) jumsalatyn shyǵyndardyń úlesi tómen. Aýditorlar qoldanbaly ǵylymi ázirlemeler engizýdi jandandyryp, olardy ekonomikanyń naqty sektorynyń suranystaryna beiimdeý qajettigine de nazar aýdardy.
Baǵdarlamalyq qujattarda belgilengen ǵylym salasyndaǵy memlekettik saiasattyń negizgi maqsattary Ǵylym jáne joǵary bilim ministrliginiń damý josparynda tolyq kórinis tappaǵan. Ǵylym komiteti men salalyq memlekettik organdar arasynda tiisti ózara is-qimyldyń joq ekeni de baiqalady, bul ǵylymi ázirlemelerdi sapaly engizýde táýekelder týyndatady.
Ulttyq ǵylymi keńesterdiń (UǴK) jumysynda qosymsha nazar aýdarýdy qajet etetin faktorlar anyqtaldy. Keńesterdiń jekelegen músheleri bir mezgilde birneshe qarjylandyrylatyn jobaǵa qatysqany anyqtaldy, bul múddeler qaqtyǵysy táýekelin týyndatady jáne retteý rásimderin odan ári jetildirýdi talap etedi.
«Sonymen birge ǵylymi keńes músheleriniń saraptamalyq qorytyndylardy esepke almai qabyldaǵan sheshimderi úshin, buzýshylyqtary bar jobalardy maquldaǵany úshin, sondai-aq ózderi buryn maquldaǵan jobalardy qarjylandyrýdy toqtatqany úshin jaýapkershiligi belgilenbegen», - dep atap ótti aýditorlar.
Ǵylymi konkýrstardy aitarlyqtai keshiktirip jariialaý, keibir jaǵdailarda 500 kúnnen artyq keshiktirý faktileri tirkeldi. Ǵylymi-tehnikalyq saraptama rásimderiniń merzimderi saqtalmaidy.
Qarajattyń paidalanylýyn jáne nátijelerge qol jetkizilýin baqylaýdy qamtamasyz etýge arnalǵan ǵylymi jobalardyń monitoringi aitarlyqtai nátije bermeidi. Eskertýler, pysyqtaý boiynsha usynymdar nemese jekelegen kemshilikteri bolsa da, jobalar odan ári qarjylandyrylyp otyrǵan.
Ǵylym qoryn kommertsiialandyrý jobalaryn iske asyrýda da kemshilikter bar. Aiaqtalǵan 42 joba josparly satý kólemine jetpegen, al 8 joba boiynsha múlde ónim shyǵarylmaǵan.
Jetekshi joǵary oqý oryndarynyń janynan injiniringtik ortalyqtar men tehnoparkter ashýda qarajatty maqsatqa sai paidalanbaý jáne satyp alý qunyn arttyrý faktileri anyqtaldy.
Memlekettik aýdit qorytyndysy boiynsha barlyǵy 1,7 mlrd teńge qarjylyq buzýshylyqtar anyqtaldy.
24,2 mlrd teńge tiimsiz josparlanǵan, 42,5 mlrd teńge tiimsiz paidalanylǵan.
Anyqtalǵan buzýshylyqtardyń jekelegen faktileri boiynsha materialdar quqyq qorǵaý organdaryna jiberiledi.
Barlyq anyqtalǵan buzýshylyqtar men júieli kemshilikterdi joiý úshin Úkimetke, Ǵylym jáne joǵary bilim ministrligine jáne basqa da beiindi mekemelerge tiisti usynymdar men tapsyrmalar berilgen.
