Qazaqstannyń TJM Shýchinsk qalasyndaǵy oqiǵany tergeý jónindegi vedomstvoaralyq komissiia qurdy, dep habarlaidy Dalanews.kz.
Tótenshe jaǵdailar ministri general‑leitenant Shyńǵys Árinovtiń buiryǵymen Aqmola oblysynyń Shýchinsk qalasynda bolǵan tótenshe oqiǵanyń sebepterin anyqtaý jónindegi vedomstvoaralyq komissiia quryldy.
Komissiiaǵa TJM basshysy tóraǵalyq etedi. Onyń quramyna Ishki ister, Densaýlyq saqtaý, Eńbek jáne halyqty áleýmettik qorǵaý, Energetika, Ónerkásip jáne qurylys, Ádilet, Saýda jáne integratsiia ministrlikteriniń basshylyǵy, sondai-aq Aqmola oblysy ákimdiginiń ókilderi kirdi.
Komissiiaǵa oqiǵanyń sebepterin jan-jaqty, tolyq jáne obektivti tergeýdi qamtamasyz etip, uqsas jaǵdailardyń qaitalanýyna jol bermeý úshin qajetti uiymdastyrýshylyq jáne aldyn alý sharalaryn ázirleý tapsyryldy.
Zardap shekken adamdarǵa jáne qaitys bolǵan adamdardyń otbasylaryna meditsinalyq jáne psihologiialyq qoldaýdy qosa alǵanda, barlyq qajetti kómek kórsetiletin bolady. Aqmola oblysynyń ákimdigine qaitys bolǵan adamdardy jerleýdi uiymdastyrýǵa kómek kórsetý tapsyryldy.
Qolda bar aqparatqa sáikes Shýchinsk qalasynda bes qabatty turǵyn úige irgeles salynǵan bir qabatty dámhanada gaz‑áýe qospasynyń jarylýy oryn alyp, keiin órt shyqqan bolatyn.
Aqmola oblysy Tótenshe jaǵdailar departamentiniń bólimsheleri habar alǵannan keiin bes minýt ishinde oqiǵa ornyna jetti.
Avariialyq-qutqarý jumystary barysynda árqaisysynyń kólemi 50 litrlik bes gaz ballony jáne eki ottegi ballony órtten shyǵaryldy, bul jarylystardyń qaitalanýyna jol berilmedi. Órt sóndirýshiler órtenip jatqan úi-jaidan 10 adamdy qutqardy.
Oqiǵa saldarynan 28 adam zardap shekti, olardyń 13-i aýrýhanaǵa jatqyzyldy, 8 adamǵa meditsinalyq kómek kórsetilgennen keiin úilerine jiberildi.7 adam qaitys boldy.
