Dárigerler Shýchinskidegi jarylystan zardap shekken aýyr haldegi naýqastardyń ómiri úshin kúresip jatyr, dep habarlaidy Dalanews.kz.
Aqmola oblysy Densaýlyq saqtaý basqarmasynyń basshysy Nariman Ermektiń sózinshe, tragediiadan zardap shekken barlyq adamdarǵa táýlik boiy kómek kórsetilip jatyr.
"Qazir biz «Avitsenna Býrabai» JShS aýrýhanasyndamyz, munda 4 aýyr naýqas jatyr. Sonymen qatar, tańerteń Aqmola oblysynyń ákimi orynbasary Altynai Amrenovamen birge kópsalaly oblystyq aýrýhananyń naýqastaryn qaradyq. Ondaǵy naýqastardyń jaǵdaiy aýyr, biraq turaqty", - deidi Nariman Ermek.
Munda taǵy 4 naýqas jasandy ókpe jeldetý apparatynda jatyr.
"Ekeýiniń jaǵdaiy asa aýyr. Sonymen qatar, barlyq kúsh-jiger jumsalyp, kómek kórsetilip jatyr. Astanadan anesteziolog-reanimatologtar, efferentologtar keldi, olar qazir gemofiltratsiia protsedýrasyn júrgizýde. Barlyq qajetti shyǵyn materialdary, dári-dármekter, preparattar jáne kerek-jaraqtar bar. Biz qazir qarap shyqtyq – bári jetkilikti mólsherde. Kómek tolyq kólemde kórsetilip jatyr jáne Aqmola oblysy ákimdigi men Densaýlyq saqtaý ministrliginiń baqylaýynda", - deidi basqarma basshysy.
Eske salaiyq, 28 aqpanda "Tsentr plova" dámhanasynda gaz-aýa qospasy jarylyp, órt shyǵyp, saldarynan 28 adam zardap shekti, 5 adam oqiǵa ornynda qaza tapty, taǵy ekeýi aýrýhanaǵa jetkizilgen kezde kóz jumdy. 13 adam meditsinalyq kómek alyp jatyr.
