Дәрігерлер Щучинскідегі жарылыстан зардап шеккен ауыр халдегі науқастардың өмірі үшін күресіп жатыр, деп хабарлайды Dalanews.kz.

Ақмола облысы Денсаулық сақтау басқармасының басшысы Нариман Ермектің сөзінше, трагедиядан зардап шеккен барлық адамдарға тәулік бойы көмек көрсетіліп жатыр.

"Қазір біз «Авиценна Бурабай» ЖШС ауруханасындамыз, мұнда 4 ауыр науқас жатыр. Сонымен қатар, таңертең Ақмола облысының әкімі орынбасары Алтынай Амреновамен бірге көпсалалы облыстық аурухананың науқастарын қарадық. Ондағы науқастардың жағдайы ауыр, бірақ тұрақты", - дейді Нариман Ермек.

Мұнда тағы 4 науқас жасанды өкпе желдету аппаратында жатыр.

"Екеуінің жағдайы аса ауыр. Сонымен қатар, барлық күш-жігер жұмсалып, көмек көрсетіліп жатыр. Астанадан анестезиолог-реаниматологтар, эфферентологтар келді, олар қазір гемофильтрация процедурасын жүргізуде. Барлық қажетті шығын материалдары, дәрі-дәрмектер, препараттар және керек-жарақтар бар. Біз қазір қарап шықтық – бәрі жеткілікті мөлшерде. Көмек толық көлемде көрсетіліп жатыр және Ақмола облысы әкімдігі мен Денсаулық сақтау министрлігінің бақылауында", - дейді басқарма басшысы.

Еске салайық, 28 ақпанда "Центр плова" дәмханасында газ-ауа қоспасы жарылып, өрт шығып, салдарынан 28 адам зардап шекті, 5 адам оқиға орнында қаза тапты, тағы екеуі ауруханаға жеткізілген кезде көз жұмды. 13 адам медициналық көмек алып жатыр.