Ridder qalasynda bilim berý, densaýlyq saqtaý jáne qalalyq infraqurylymdy damytýǵa baǵyttalǵan iri áleýmettik mańyzy bar jobalardy iske asyrý jalǵasýda. Atalǵan jumystar oblystyq áleýmettik nysandar qurylysy baǵdarlamasy aiasynda júrgizilýde, dep habarlaidy Dalanews.kz.
Bilim berý salasyndaǵy negizgi jobalardyń biri – 600 oryndyq jańa mekteptiń qurylysy. Joba investor qarajaty esebinen júzege asyrylýda. Qurylys jumystary 2025 jyldyń qańtar aiynda bastaldy, qazirgi tańda nysannyń daiyndyq deńgeii 35% quraidy. Qarjylandyrý tolyq qamtamasyz etilgen jaǵdaida mektepti 2026 jyldyń shilde aiynda paidalanýǵa berý josparlanǵan. Sonymen qatar, oqý ornynyń tolyqqandy jumys isteýin qamtamasyz etý maqsatynda syrtqy injenerlik jeliler, kirme joldar men avtoturaqtar salynýda.
Qaladaǵy densaýlyq saqtaý júiesinde de aitarlyqtai ózgerister oryn alýda. Ridder qalasyndaǵy kópbeiindi aýrýhananyń daiyndyq deńgeii 98%, qurylys jumystaryn aiaqtap, nysandy 2025 jyldyń jeltoqsan aiynda paidalanýǵa berý josparlanyp otyr. Bul joba qala turǵyndaryna kórsetiletin meditsinalyq kómektiń qoljetimdiligi men sapasyn edáýir arttyrýǵa múmkindik beredi.
Áleýmettik infraqurylymdy damytý sport salasyn da qamtyp otyr. Jaqyn mańdaǵy Bozanbai aýylynda dene shynyqtyrý-saýyqtyrý kesheniniń qurylysy aiaqtalý satysynda, qazirgi ýaqytta anyqtalǵan eskertýlerdi joiý jumystary júrgizilip, nysan paidalanýǵa berýge daiyndalýda.
Jalpy alǵanda, 2025 jyldyń sońyna deiin meditsinalyq jáne bilim berý baǵytyndaǵy birqatar áleýmettik mańyzy bar nysandardyń qurylysyn aiaqtaý josparlanǵan. Bul óz kezeginde Ridder qalasy men oǵan jaqyn eldi mekenderdiń turǵyndary úshin ómir súrý sapasyn jaqsartýǵa oń áserin tigizedi.
Jobalardyń iske asyrylý barysy oblystyq qurylys basqarmasynyń turaqty baqylaýynda. Jumystardyń belgilengen merzimde jáne sapaly oryndalýyna, sondai-aq jobalyq-smetalyq qujattamalardyń saqtalýyna erekshe nazar aýdarylýda.
