Shyǵys Qazaqstanda 16 mektepke ult qaıratkerleriniń esimderi berildi. Bul týraly oblys ákiminiń orynbasary Jaqsylyq Omar habarlady.

 Atap aıtsaq, Úkimettiń qaýlysymen Óskemen qalasyndaǵy №33 mektepke Abaıdyń, №1 orta mektepke Shákárimniń, №3 mektep-gımnazıaǵa  Shoqan Ýalıhanovtyń, №16 mektepke Zákı Ahmetovtiń, Rıdder qalasyndaǵy №3 orta mektepke Dinmuhamed Qonaevtyń esimderi berildi.

– Elimizdiń damý tarıhynda orny bar memleket jáne qoǵam qaıratkerleriniń esimderiniń óńirimizdegi mektepter men basqa da mekemelerge berilýi qýantady. Munyń jas býyndy elshil, memleketshil rýhta tárbıeleýdegi máni óte zor. Sondaı-aq bul Táýelsizdigimizdiń 25 jyldyq mereıtoıy aıasynda turǵyndarymyzǵa erekshe tartý boldy, – dedi aımaq basshysynyń orynbasary Jaqsylyq Omar.

Sondaı-aq, Ulan aýdany Blagodarnoe orta mektebi Ahmet Baıtursynulynyń, Úrjardaǵy Krýpskaıa atyndaǵy mektep-balabaqshasy Abylaıhannyń, Óskemendegi ortalyq kitaphanaǵa Oralǵan Bókeıdiń esimderimen ataldy. Ult qaıratkerlerimen birge óńir tarıhynda orny bar tulǵalardyń esimderi de qurmettelip, bilim jáne mádenıet ordalaryna berildi.