Óskemende «Altay athletics» kásibı jeńil atletıka sport klýby ashyldy. Elimizde alǵash ret ashylyp otyrǵan klýbtyń quramyna Olımpıada chempıony Olga Rypakova da múshe bolyp kirdi.
Aıta ketsek, aǵymdaǵy jyly Shyǵys Qazaqstan oblysynyń ákimi Danıal Ahmetovtyń tapsyrmasymen aımaqta Qazaqstandaǵy alǵashqy «Altay athletics» kásibı jeńil atletıka sport klýby qurylǵan. Klýbtyń ashylý saltanatynda oblys basshysy Olımpıada chempıony Olga Rypakovaǵa «2016 jyldyń Úzdik sportshysy» atty jeńil atletıkadan Azıa Federasıasynyń kýbogin tabystady.
–Aımaǵymyzdaǵy sporttyń jańa serpin alǵanyna óte qýanyshtymyz. Muny bizdiń beldi sportshymyz Olga Rypakovanyń bastaǵany qýantarlyq jaǵdaı. Barlyq balalardyń sporttyń jaı ǵana qyzyǵýshylyq emes, eliniń laıyqty, kásibı azamaty bolýyna úlken múmkindik ekenin túsinse deımin. Aldaǵy jyldarda «Altaı» brendyn kúlli álem tanysa degen oıdamyz, – dedi Danıal Ahmetov.
Óz kezeginde, Olga Rypakova óńirimizdegi atalmysh sport túrine qoldaý tanytqany úshin oblys ákimine alǵysyn bildirdi.
Aıta keteıik, klýb qurylǵannan beri, «Gaýhar Lıgasynda» Olga Rypakova altyn medal, Karolın Kıpkırýı kúmis júlde jáne Nora Djerýta qola medal ıelenip úlgergen.
Atalmysh klýb eýropalyq sport klýbtarynyń ishindegi aldyńǵy qatarly, 94 jyldyq tarıhy bar «LC Zurich» klýbymen jumys jasaıtyn bolady. Qazirdiń ózinde «Altay athletics» pen «LC Zurich» memorandýmǵa qol qoıyp, birlese jumys istemek. Aıta keteıik, klýb músheleriniń quramyna Olımpıada chempıony Olga Rypakova, sonymen qatar Varvara Nazarova jáne Artýr Gafner syndy shyǵysqazaqstandyq jas sportshylar endi. Sondaı-aq, QR jeńil atletıkanyń damýyna serpin berý úshin, jobanyń alǵashqy bastamasynda kenıalyq sportshylar klýbqa múshe bolyp kirdi. Klýbtyń Bas menejery 30 jylǵa jýyq ýaqyt halyqaralyq iri sport uıymdarynda jumys atqarǵan Gvıdo Tononı bolyp tabylady.
