Belgili jýrnalist Gúlnara Bajkenova Kárim Másimovtiń prezidentten keshirim surap, raqymshylyq jasaýy týraly ótinishi jaily ne oilaitynyn aitty, - dep habarlaidy Dalanews.kz.
"Men Másimov prezidentten keshirim suraǵanyn estigen kezimde, onyń bostandyqqa shyǵýy qanshalyq múmkin ekenin emes, ne úshin keshirim suraǵanyn oilai bastadym. Ol oqyǵan, bilimdi adam bola tura keshirim suraǵany qalai dep oiladym. Sebebi raqymshylyq ol kóbine ólim jazasyna qatysty beriledi. Qazaqstanda da, álem elderinde de prezidentter ólim jazasyna kesilgen adamǵa raqymshylyq jasai alady. Ólim jazasyna kesilerden 1 minýt buryn keshirgen kezder de bolǵan. Muny prezident janyndaǵy komissiia da sheshedi. Qazaqstanda ólim jazasy alynyp tastaldy. Sondyqtan bul jerde raqymshylyqtyń ne qatysy bar? Prezident sottyń úkimin ózgerte almaidy.
Kárim Másimov 18 jylǵa bas bostandyǵynan aiyryldy. Osy 18 jyl degen úkimdi ózgertýge prezident Toqaevtyń quzyreti joq. Eldegi sot – táýelsiz, bir adam aitty eken dep sheshimdi ózgerte salmaidy. Qaidaǵy raqymshylyq? Kárim Másimov prezidentten úkimniń kúshin joiýdy nemese jazasyn jeńildetýdi surap otyr ma? Nege Prezidentten surap otyr? Sebebi ol prezident úkimdi ózgerte almaitynyn bilip otyr ǵoi. Raqymshylyqty jaidan jai suraǵan joq qoi. Ol bul iste jaidan jai paida bola salmaǵan adam ǵoi, ol zańdy biledi, advokattary da zańnan habardar. Sondyqtan men úshin, eń aldymen, ne bolyp jatqany túsiniksiz. Raqymshylyq týraly aqparat ne úshin tarap ketti? Qandai boljam bar? Demek shyn máninde bir nárse sheshilip jatyr degen sóz. Eger aqparat tarap ketken bolsa, halyqtyń reaktsiiasyn kútip otyrǵan shyǵar? Olar muny qalai qabyldaidy, qalai talqyǵa túsedi degendei. Biraq taǵy da qaitalap aitamyn, raqymshylyq berilýi - zańsyz. Prezident sot sheshimin ózgerte almaidy, sebebi Másimov ólim jazasyna kesilgen joq", - deidi Bajkenova Orda.kz-ke bergen suhbatynda.
Eske salaiyq, buǵan deiin májilis depýtaty Ermurat Bapi Ulttyq qaýipsizdik komitetiniń (UQK) burynǵy tóraǵasy Kárim Másimovten bostandyqqa shyǵý úshin Qańtar týraly bar shyndyqty aitý suralǵanyn aitqan bolatyn.
"Másimov uiymdastyrýshy boldy dep oilamaimyn. Sondyqtan batyl málimdeme jasasa, oǵan jumsaq qaraýǵa bolady. Mysaly, ol Qaýipsizdik Keńesi tóraǵasynyń buiryqtaryn oryndaýǵa májbúr bolsa (Qańtar oqiǵasyna deiin ony Nursultan Nazarbaev basqardy). Kárim Másimov uzaq jyl boiy premer-ministr jáne Nazarbaevtyń senimdi adamy boldy. Ol onyń jeke tapsyrmalaryn oryndap qana qoimai, tuńǵysh prezidenttiń jeke biznesin de júrgizip otyrdy. Másimov onyń aktivterin shyǵarýmen ainalysty, iaǵni áigili Qazaqgeitten keiin Eýropadan shyǵardy, sondai-aq, eski Qazaqstannyń aktivterin Ońtústik-Shyǵys Aziia, Qytai, Shanhai, Gonkong, Ámirlikterge jiberýmen ainalysty. Másimov barlyq tranzaktsiiany ashyp, esesine basyna bostandyq surasa, oǵan keshirim berý kerek dep oilaimyn", – dedi Májilis depýtaty Ermurat Bapi.
Bapidiń pikirinshe, Kárim Másimov Qańtar oqiǵasyn uiymdastyra almady. Onyń aitýynsha, Másimov shyn máninde ne bolǵanyn baiandap, basty uiymdastyrýshynyń atyn ataýy kerek.
"Shyǵarylǵan aktivter týraly aqparatty bilý ony túrmede ustaýdan góri mańyzdy. Onyń qamaýda otyrǵanynan halyqqa eshqandai paida joq", - deidi Bapi.
Al 2023 jyly 24 sáýirde Astananyń qylmystyq ister jónindegi mamandandyrylǵan aýdanaralyq soty QR Ulttyq qaýipsizdik komitetiniń eks-tóraǵasy Kárim Másimovke, Ulttyq qaýipsizdik komiteti tóraǵasynyń eks-orynbasarlary Ánýar Sadyqulov, Dáýlet Erǵojin, Marat Osipovke qatysty qylmystyq is boiynsha úkim shyǵarǵan bolatyn.
Sot isti "Asa qupiia" degen belgimen qarady. Kárim Másimov QR Qylmystyq kodeksiniń 175-babynyń 1-bóligi, 179-babynyń 3-bóligi, 362-babynyń 4-bóliginiń 3-tarmaǵy boiynsha kináli dep tanylyp, 18 jyl bas bostandyǵynan airyldy. Sonymen qatar, memlekettik qyzmette ómir boiy qyzmet ete almaityny jáne múlki tárkilenetini aityldy. Kárim Másimov buǵan qosa general sheni men memlekettik nagradalarynan aiyryldy.
Al onyń orynbasary Dáýlet Erǵojin Qylmystyq kodekstiń 179-babynyń 3-bóligi, 362-babynyń 4-bóligi 3-tarmaǵy boiynsha kináli dep tanylyp, 15 jylǵa bas bostandyǵynan aiyryldy.
Keiin apelliatsiialyq saty K.Másimovke, A. Sadyqulovqa jáne D. Erǵojinge qatysty birinshi satydaǵy sot úkimin qaýipsizdigi eń joǵary mekemeden qaýipsizdigi ortasha mekemede jazasyn óteý boiynsha ózgertti.
