Qýandyq Bıshimbaevtyń anasy sotta sóz sóıledi, - dep habarlaıdy Dalanews.kz.
Ol Saltanat Núkenovanyń ólimine qatysty máskeýlik sarapshynyń saraptama nátıjesiniń sheshimin is materıaldaryna qosýdy qoldaýdy surady.
"Men, árıne, zańger emespin. Biraq eger bizdiń máskeýlik saraptamanyń nátıjesin qabyldamasańyzdar, meniń ulymnyń konstıtýsıalyq quqyǵy buzylady dep oılaımyn. Sondyqtan sot, alqabıler, prokýrorlar men jábirlenýshi taraptan meni ana retinde túsinýdi suraımyn. Muny shyn júregimmen aıtyp otyrmyn", - deıdi Bıshimbaevtyń anasy.
Eske salaıyq, buǵan deıin almatylyq sarapshy Núkenovanyń ólimine sebep bolǵan jaraqattardy kórsetken bolatyn. Sot-medısınalyq saraptama qyzmetkeri Tahır Halımnazarov Saltanat Núkenova qandaı jaraqattar alǵanyn manekende kórsetti.
Tahır Halımnazarovtyń sózinshe, bul jaraqattar Núkenovanyń máıitin saraptaý nátıjesinde anyqtaldy.
Iaǵnı, alǵashqy saraptamany júrgizgen sarapshylar anyqtaǵan. Bul jaraqattar sarapshynyń qorytyndysynda sıpattalǵan.
Sarapshynyń sózinshe, munyń bári jalpylama bas jaraqaty bolyp sanalady. Oǵan betindegi jaraqattar da, bas súıegindegi jaraqattar da jatady.
Sot medısınasynda bul jaraqattardyń bári syrtqy áserdiń kesirinen bolǵan zaqymdaný retinde qarastyrylady.
Tahır Halımnazarovtyń sózinshe, ólimniń sebebin aıtqan kezde osy jaraqattardyń bárin qarastyrý kerek. Olardyń árqaısyn bólek qarastyrýǵa bolmaıdy.
Sarapshy qulaýdan alǵan jaraqattar bolmaǵanyn aıtady. Al Bıshimbaev Núkenova qabyrǵaǵa soǵylyp, artynsha ýnıtazǵa qulap túskenin aıtqan bolatyn.
Sonymen qatar, sot-medısınalyq sarapshy Saltanat Núkenovanyń basyndaǵy sýbdýraldy gematomanyń mólsheri 230 gram bolǵan. Bul ólimge ákeledi.
Tahır Halımnazarovtyń sózinshe, Bıshimbaev ony qolmen urdy ma, alaqanmen urdy ma - mańyzdy emes. Sebebi bul jaǵdaıda urǵan adamnyń salmaǵy aıtarlyqtaı áser etetin kórinedi. Salmaǵy iri adam alaqanymen bolsa da aýyr jaraqattaýy múmkin.
