Shymkentte qala ákiminiń orynbasary Rýslan Berdenovke jasalǵan qastandyq áreketi boiynsha sot otyrysy ótip jatyr. Sottalýshy oryndyǵynda otyrǵan Ernar Jiembai sot tyńdaýynda kútpegen málimdeme jasady, dep habarlaidy Dalanews.kz
Sotta jaýap berý barysynda Ernar Jiembai joǵary laýazymdy sheneýnik qastandyqty uiymdastyrǵany týraly jalǵan aqparatty aitýǵa ótinish jasalǵanyn jetkizdi.
"Eń qyzyǵy, maǵan qyzmetker arqyly arnaiy ótinish aityldy. Meni jaldamaly kisi óltirýshi retinde kórsetýdi surady. Solai jasasań, seni tipti o dúnieden bolsa da Rýslan Berdenovtyń ózi alyp shyǵady dedi", – dep málimdedi sottalýshy Ernar Jiembai.
Osy sátte sottalýshynyń sózin prokýror toqtatyp, sýdiaǵa istiń mánine qatysy joq aqparattyń aitylyp jatqanyn aitty.
"Qurmetti sot tóraǵasy, aiyptalýshy istiń mán-jaiyna qatysy joq derekterdi aityp jatyr. Eger jaýap berýin aiaqtasa, suraqtarǵa kóshýdi suraimyn", – dedi prokýror.
Buǵan deiingi jaǵdai
Eske salaiyq, buǵan deiin Rýslan Berdenov sotqa kelýge mindettelgeni habarlandy. Sot otyrysynda sýdia Ábinur Qarabaev Rýslan Berdenovti 6 tamyzǵa josparlanǵan negizgi sot protsesine mindetti túrde qatysýǵa shaqyrdy.
Sebebi Rýslan Berdenov aldyn ala tyńdaýǵa ózi kelmegen edi. Onyń ókili Rýslan Berdenov em qabyldap jatqanyn málimdedi.
Ákimdik mańyndaǵy atys týraly
21 sáýirde Shymkent qalasy ákimdigi ǵimaraty mańynda atys boldy. Saldarynan Rýslan Berdenov jaraqat aldy. Artynsha kúdikti ustalyp, ýaqytsha ustaý izoliatoryna qamaldy, bul derek boiynsha qylmystyq is qozǵaldy.
Bul is boiynsha basty kúdikti - Ernar Jiembai. Ashyq formatta ótken aldyn ala tyńdaý kezinde sýdia Jiembaidyń sot protsesi barysynda ózin túsirýge qarsy ekenin jetkizdi.
