Oblys ákimi J.Túimebaev, qala ákimi N.Saýranbaev jáne erikti jastar men qala turǵyndary birlese aýmaǵy 38 gektar jerdi quraityn «Samal» shatqalynda qaraǵash kóshetterin otyrǵyzdy.
Aǵash otyrǵyzý - qasietti de ulaǵatty is ekenin aitqan aimaq basshysy atalǵan demalys oryndary óńir turǵyndarynyń taza aýada tynyǵyp, demalýy úshin jasalyp jatqanyn aitty. Sonymen qatar, ol saiabaqtardyń tazalyǵy men damýyna birlese kúsh salý qajettigin atap ótip, bolashaqta jaiaý júrginshilerge arnalǵan jol salynyp, onyń boiynan saýda oryndary salynatynyn da jetkizdi.
Qazirgi tańda Shymkent qalasynda Ońtústik Qazaqstan oblysynyń ákimi Janseiit Túimebaevtyń bastamasymen qolǵa alynǵan jobalardyń biri – «Shatqal» baǵdarlamasy sátti júrgizilip keledi. Sodan beri bos jatqan sai-salaǵa kóshetter egilip, saiabaqqa ainalýda.
Jalpy Shymkent qalasyndaǵy jeti shatqaldyń jalpy aýmaǵy 124 gektar jerdi qurap otyr. Osy shatqaldarda búginde tamshylatyp sýǵarý júiesi ornatylǵan. Sondai-aq, kóshetterdi kútip-baptaý úshin árbir shatqalda turaqty mamandar jumys isteidi. Jalpy egilgen kóshetterdiń ónimdiligi 75 paiyzdy quraidy. Onyń arasynda tabiǵi qýraý protsesi bar. Mamandardyń aitýynsha, bul joǵary ónimdilikti kórsetedi.
Aldaǵy ýaqytta «Nursát» shaǵynaýdanyndaǵy Qasiret memorialy tusynda, «Qaitpas-2» shaǵyndaýdandaǵy Ippodrom mańynda jáne «Bozaryq», «Bozaryq-2», «Tasken» shaǵynaýdandarynda, Almaty-Tashkent baǵytynda jalpy aýmaǵy 690 gektarǵa jýyq shatqaldar aýmaǵyna kóshetter otyrǵyzylatyn bolady.
Aita keteiik, búginde Ońtústik Qazaqstan oblysy kóleminde «Shatqal» baǵdarlamasymen 400 myń túpten astam jasyl jelek egilgen.
OQO ákiminiń baspasóz qyzmeti
