وبلىس اكىمى ج.تۇيمەبايەۆ، قالا اكىمى ن.ساۋرانبايەۆ جانە ەرىكتى جاستار مەن قالا تۇرعىندارى بىرلەسە اۋماعى 38 گەكتار جەردى قۇرايتىن «سامال» شاتقالىندا قاراعاش كوشەتتەرىن وتىرعىزدى.
اعاش وتىرعىزۋ - قاسيەتتى دە ۇلاعاتتى ءىس ەكەنىن ايتقان ايماق باسشىسى اتالعان دەمالىس ورىندارى ءوڭىر تۇرعىندارىنىڭ تازا اۋادا تىنىعىپ، دەمالۋى ءۇشىن جاسالىپ جاتقانىن ايتتى. سونىمەن قاتار، ول ساياباقتاردىڭ تازالىعى مەن دامۋىنا بىرلەسە كۇش سالۋ قاجەتتىگىن اتاپ ءوتىپ، بولاشاقتا جاياۋ جۇرگىنشىلەرگە ارنالعان جول سالىنىپ، ونىڭ بويىنان ساۋدا ورىندارى سالىناتىنىن دا جەتكىزدى.
«سامال» شاتقالىندا قۇرىلعان كۇننەن بەرى ەمەن، ايلانت، ۇيەڭكى، شاعان، بوز ارشا، اققايىڭ، قاراعاش سىندى 11 مىڭنان استام كوشەت وتىرعىزىلعان بولسا، بۇگىن ءجۇز تۇپتەن استام قاراعاش كوشەتى ەگىلدى. مۇندا سۋعارۋعا ارنالعان جەتى بوشكە مەن بەس تىك سۋ ۇڭعىماسى بار. شاتقالدا بەس ادام تۇراقتى جۇمىس ىستەيدى.
قازىرگى تاڭدا شىمكەنت قالاسىندا وڭتۇستىك قازاقستان وبلىسىنىڭ اكىمى جانسەيىت تۇيمەبايەۆتىڭ باستاماسىمەن قولعا الىنعان جوبالاردىڭ ءبىرى – «شاتقال» باعدارلاماسى ءساتتى جۇرگىزىلىپ كەلەدى. سودان بەرى بوس جاتقان ساي-سالاعا كوشەتتەر ەگىلىپ، ساياباققا اينالۋدا.
جالپى شىمكەنت قالاسىنداعى جەتى شاتقالدىڭ جالپى اۋماعى 124 گەكتار جەردى قۇراپ وتىر. وسى شاتقالداردا بۇگىندە تامشىلاتىپ سۋعارۋ جۇيەسى ورناتىلعان. سونداي-اق، كوشەتتەردى كۇتىپ-باپتاۋ ءۇشىن ءاربىر شاتقالدا تۇراقتى ماماندار جۇمىس ىستەيدى. جالپى ەگىلگەن كوشەتتەردىڭ ونىمدىلىگى 75 پايىزدى قۇرايدى. ونىڭ اراسىندا تابيعي قۋراۋ پروسەسى بار. مامانداردىڭ ايتۋىنشا، بۇل جوعارى ونىمدىلىكتى كورسەتەدى.
الداعى ۋاقىتتا «ءنۇرسات» شاعىناۋدانىنداعى قاسىرەت مەموريالى تۇسىندا، «قايتپاس-2» شاعىنداۋدانداعى يپپودروم ماڭىندا جانە «بوزارىق»، «بوزارىق-2»، «تاسكەن» شاعىناۋداندارىندا، الماتى-تاشكەنت باعىتىندا جالپى اۋماعى 690 گەكتارعا جۋىق شاتقالدار اۋماعىنا كوشەتتەر وتىرعىزىلاتىن بولادى.
ايتا كەتەيىك، بۇگىندە وڭتۇستىك قازاقستان وبلىسى كولەمىندە «شاتقال» باعدارلاماسىمەن 400 مىڭ تۇپتەن استام جاسىل جەلەك ەگىلگەن.
وقو اكىمىنىڭ باسپا ءسوز قىزمەتى
