Shymkent qalalyq juqpaly aýrýlar aýrýhanasynda oryn jetispei, naýqas balalarmen kelgen analar dálizdiń edeninde túnep júr. Mekemedegi jaǵdaidy kelýshiler videoǵa túsirip, áleýmettik jelide taratqan, dep habarlaidy Dalanews.kz.
HALYQSTAN Telegram-arnasynyń habarlaýynsha, kadrlarda balalar bóliminde naýqastardyń dáliz boiyna tóselgen matrastarda jatqanyn kórýge bolady.
"Million turǵyny bar qalada áli kúnge deiin jetkilikti tósek-orny bar zamanaýi infektsiialyq aýrýhana nege joq?" – deidi videodaǵy áiel.
Atalǵan aýrýhana 40 jyldan astam buryn salynǵan jáne nebári 360 orynǵa arnalǵan. Munda eresekter de, balalar da qabyldanady, al olardyń ishinde eń kóp júkteme dál balalar bólimshesine túsedi.
Jyl basynda mekemede kúrdeli jóndeý júrgizilip, jeldetý men jylytý júieleri aýystyrylǵan, jabdyqtar jańartylǵan. Alaida naýqastardyń aitýynsha, jaǵdai áli de nashar.
Shymkent qalalyq ákimdigi balalar bólimshesiniń tolyp ketkenin rastady. Qalalyq densaýlyq saqtaý basqarmasynyń ókilderi naýqastardyń dálizde ýaqytsha jatqyzylýyn "jóndeý jumystary júrip jatqanyna bailanysty shara" dep túsindirip, mundai jaǵdai sanitarlyq normalardy buzý bolyp sanalmaitynyn aitty.
"Aýrýhananyń on bólimshesiniń segizi táýlik boiy jumys isteidi jáne asa qaýipti infektsiialarǵa shaldyqqan naýqastarǵa kómek kórsetedi. Palatalar 2–4 orynǵa arnalǵan, jeke sanitarlyq toraptar men jeldetý júiesimen jabdyqtalǵan", – dep habarlady ákimdik.
Densaýlyq saqtaý basqarmasy ókilderiniń aitýynsha, naýqastar kóp túsken jaǵdaida dálizde ýaqytsha ornalastyrýǵa ruqsat etiledi jáne bul Densaýlyq saqtaý ministrliginiń buiryqtaryna sáikes júrgiziledi.
Aýrýhana ákimshiligi barlyq naýqastar dárigerlerdiń baqylaýynda ekenin jáne qajetti em-dom kórsetilip jatqanyn málimdedi.
