Shymkentte qoǵam tynyshtyǵyn kúzetkender marapattaldy
Oblystyq opera jáne balet teatrynda ótken Ishki ister organynyń 25 jyldyǵyna arnalǵan saltanatty shara sala mamandarynyń qyraǵy qyzmetin ulyqtaýǵa arnaldy. Sharaǵa qatysqan qala ákimi Ǵ. Ábdirahymov qoǵam tynyshtyǵyn kúzetken sala mamandaryn kásibi merekesimen quttyqtady.
Óz kezeginde, Shymkent qalalyq ishki ister basqarmasynyń basshysy, politsiia polkovnigi Arman Beisenbaev qoǵamdaǵy politsiia qyzmetkeriniń eńbegin airyqsha atap ótti. Sonymen qatar, jyl basynan beri tirkelgen quqyq buzýshylyq sany birshama tómendegenin jetkizdi. Tiisinshe, memleket tarapynan saladaǵy materialdyq bazany nyǵaitý qyzmeti de artyp keledi. Máselen, 2014 jyly qala aýmaǵynda politsiianyń bar bolǵany 29 ýchaskelik beketi bolsa, qazir olardyń sany – 68-ge jetken. Sondai-aq, qala aýmaǵyndaǵy 17 statsionarlyq beketke qosymsha taǵy 10 beket salý josparlanýda. 2015 jyly jol politseileriniń qyzmetinde bar bolǵany 5 evakýator bolsa, búginde taǵy 5 evakýator men 30 «Kia Serato» kóligin satyp alýǵa qarjy bólingen.
– Qazaqstan politsiiasy kúninde jaýapty qyzmetti abyroimen atqaryp, qoǵam tynyshtyǵyn kúzetken jandarǵa rizalyq sezimin bildirip, alǵys aitýǵa tiispiz. Bastysy, bul kún beibit ýaqytta jergilikti turǵyndardyń tynyshtyǵy men qaýipsizdigi úshin óz ómirlerin qurban etkenderge laiyqty qurmet kórsetý bolyp sanalady, – dedi Arman Arýn-Rashiduly.
Bul kúni óziniń qyzmettik mindetin atqarý kezinde opat bolǵan politseilerdiń esimi atalyp, marqumdardyń týystaryna syi-syiapat tapsyryldy.
