شىمكەنتتە قوعام تىنىشتىعىن كٷزەتكەندەر ماراپاتتالدى
وبلىستىق وپەرا جەنە بالەت تەاترىندا ٶتكەن ٸشكٸ ٸستەر ورگانىنىڭ 25 جىلدىعىنا ارنالعان سالتاناتتى شارا سالا ماماندارىنىڭ قىراعى قىزمەتٸن ۇلىقتاۋعا ارنالدى. شاراعا قاتىسقان قالا ەكٸمٸ ع. ەبدٸراحىموۆ قوعام تىنىشتىعىن كٷزەتكەن سالا ماماندارىن كەسٸبي مەرەكەسٸمەن قۇتتىقتادى.
ٶز كەزەگٸندە, شىمكەنت قالالىق ٸشكٸ ٸستەر باسقارماسىنىڭ باسشىسى, پوليتسييا پولكوۆنيگٸ ارمان بەيسەنباەۆ قوعامداعى پوليتسييا قىزمەتكەرٸنٸڭ ەڭبەگٸن ايرىقشا اتاپ ٶتتٸ. سونىمەن قاتار, جىل باسىنان بەرٸ تٸركەلگەن قۇقىق بۇزۋشىلىق سانى بٸرشاما تٶمەندەگەنٸن جەتكٸزدٸ. تيٸسٸنشە, مەملەكەت تاراپىنان سالاداعى ماتەريالدىق بازانى نىعايتۋ قىزمەتٸ دە ارتىپ كەلەدٸ. مەسەلەن, 2014 جىلى قالا اۋماعىندا پوليتسييانىڭ بار بولعانى 29 ۋچاسكەلٸك بەكەتٸ بولسا, قازٸر ولاردىڭ سانى – 68-گە جەتكەن. سونداي-اق, قالا اۋماعىنداعى 17 ستاتسيونارلىق بەكەتكە قوسىمشا تاعى 10 بەكەت سالۋ جوسپارلانۋدا. 2015 جىلى جول پوليتسەيلەرٸنٸڭ قىزمەتٸندە بار بولعانى 5 ەۆاكۋاتور بولسا, بٷگٸندە تاعى 5 ەۆاكۋاتور مەن 30 «كيا سەراتو» كٶلٸگٸن ساتىپ الۋعا قارجى بٶلٸنگەن.
– قازاقستان پوليتسيياسى كٷنٸندە جاۋاپتى قىزمەتتٸ ابىرويمەن اتقارىپ, قوعام تىنىشتىعىن كٷزەتكەن جاندارعا ريزالىق سەزٸمٸن بٸلدٸرٸپ, العىس ايتۋعا تيٸسپٸز. باستىسى, بۇل كٷن بەيبٸت ۋاقىتتا جەرگٸلٸكتٸ تۇرعىنداردىڭ تىنىشتىعى مەن قاۋٸپسٸزدٸگٸ ٷشٸن ٶز ٶمٸرلەرٸن قۇربان ەتكەندەرگە لايىقتى قۇرمەت كٶرسەتۋ بولىپ سانالادى, – دەدٸ ارمان ارۋن-راشيدۇلى.
بۇل كٷنٸ ٶزٸنٸڭ قىزمەتتٸك مٸندەتٸن اتقارۋ كەزٸندە وپات بولعان پوليتسەيلەردٸڭ ەسٸمٸ اتالىپ, مارقۇمداردىڭ تۋىستارىنا سىي-سىياپات تاپسىرىلدى.
