Búgin Ońtústik Qazaqstan oblysynyń ortalyǵy – Shymkentte oblys ákiminiń orynbasary Erbol Sadyrdyń qatysýymen otbasyndaǵy zorlyq-zombylyqtan zardap shekken azamattarǵa «Kómek» ońaltý ortalyǵy men meditsinalyq-psihologiialyq ońaltý jáne áleýmettik-psihologiialyq súiemeldeý ortalyqtary ashyldy. QR Bas prokýratýrasynyń «Otbasyndaǵy zorlyq-zombylyqsyz Qazaqstan» pilottyq jobasynyń maqsaty - otbasyndaǵy janjaldarǵa tosqaýyl qoiyp, shańyraq yntymaǵyn saqtaý bolyp tabylady.
Eń aldymen, jumysshy top shaharda búginnen bastap jumysyna kirisken «Daǵdarys ortalyǵynyń» ashylýyn tamashalady. Mekeme - otbasynda zábir kórip, zorlyq-zombylyqtyń taýqymetin tartqan azamattar men otbasy múshelerine psihologiialyq, áleýmettik qoldaý kórsetetin bolady.
Ǵimaratty aralap kórgen E.Sadyr árbir shańyraq memlekettiń bir bóligi bolyp tabylatyndyqtan, qoǵamdy órkeniettilikke jetkizý, eń aldymen otbasynyń ómirde durys baǵyt alýynan bastalatynyn jetkizdi.
«Búginde Qazaqstanda otbasy-demografiialyq saiasatqa erekshe nazar aýdarylyp otyr. Demografiialyq ósimniń jaqsaryp, Qazaqstan halqynyń sany 18 million adamǵa jetýi jáne halyqtyń ómir súrýiniń ortasha uzaqtyǵy 10 jylǵa ulǵaiýy – memlekettiń árbir otbasyǵa qamqorlyq tanytýǵa baǵyttalǵan Elbasymyzdyń sarabdal saiasatynyń jemisi», - dedi oblys ákiminiń orynbasary.
Ortalyq Qazaqstan Respýblikasynyń «Qyzyl ai» qoǵamynyń quramynda ornalasyp, «Qorǵaý-Astana» qorynyń áleýmettik jobasy aiasynda júzege asyrylýda. Jańadan ashylǵan ortalyq ǵimaratynda qabyldaý, dáriger bólmesi, qajetti quraldarmen jabdyqtalǵan psiholog, áleýmettik kabinetter, jatyn bólmeler, ashana, balalar alańshalary, mádeni tynyǵý bólmeleri qarastyrylǵan.
Munan soń, jumysshy top shaharda Baiytuly baba kóshesi boiynan ashylǵan «Meditsinalyq-psihologiialyq ońaltý ortalyǵynda» boldy. Ortalyq psihobelsendi zattardy paidalanýshy azamattarǵa meditsinalyq-psihologiialyq korrektsiia jumysyn júzege asyrady. Ortalyqta narkolog, psiholog, psihoterapevt jáne áleýmettik qyzmetkerler emdeý standarttaryna sáikes narkologiialyq jáne meditsinalyq kómek kórsetý kózdelgen. Meditsinalyq-psihologiialyq ońaltý ortalyǵy kelýshilerdi quzyrly organdardyń joldamasy arqyly qabyldaidy. 20 tósek orynmen qamtamasyz etilgen ortalyq táýlik boiy jumys júrgizetin statsionarlyq mekeme bolyp tabylady.
Al úshinshi ortalyq - áleýmettik-psihologiialyq súiemeldeý qyzmeti Shymkent qalasy ákimdiginiń Halyqqa áleýmettik qyzmet kórsetetin qalalyq aýmaqtyq ortalyǵynyń janynan ashyldy. Ortalyqta zábir kórip, zorlyq-zombylyq taýqymetin tartqandar, kereǵar dini aǵymdardan zardap shekkenderge psihologiialyq qoldaý kórsetiledi. Munda internet jelisi arqyly skaip júiesimen onlaindy suhbattasý, keńester alý sharalary josparlanǵan.
