– «Naýryz – Shymkentten bastalady» atty megajobasy aiasynda 103 is-shara ótti. Bul merekelik jiyndarǵa 213 mln teńge jumsaldy. Al qaznette talqyǵa túsken 572 mln teńge Shymkent qalasy máslihat depýtattarynyń qoldaýymen jyl sońyna deiin ótkiziletin is-sharalarǵa bólingen.
Jalpy, Ulystyń Uly kúnine orai 157 merekelik jiyn ótkizýdi josparlaǵanbyz. Biraq epidemiologiialyq ahýalǵa bailanysty olardyń sany qysqardy, – dedi Hanzada Ázimhanqyzy.
Osy oraida Shymkent qalasy ákiminiń birinshi orynbasary Shyńǵys Muqan on kúndik mereke barysyna toqtaldy.
– Ulystyń Uly kúninde Shymkent qalasyna búkil halyqty jinaýǵa bolatynyna kózimiz jetti. Tarqatyp aitsam, keshegi «Naýryz – Shymkentten bastalady» atty megajobasy aiasynda úshinshi megapoliske kelýshilerdiń sany eki-úsh esege artqan. Iaǵni, biz bir maqsatty oryndadyq degen sóz.
Biraq merekeni jospardaǵydai óz deńgeiinde ótkizdik dei almaimyz. Indetke bailanysty jappai merekelik serýendeý bolǵan joq. Oǵan qosa, ashyq alańdaǵy baǵdarlamalar aýa-raiynyń qolaisyzdyǵyna bailanysty kontserttik zaldarǵa aýystyrylyp, kelýshilerdiń sany shektelýmen uiymdastyryldy. Al mereke qyzǵan shaqta 21, 22, 23 naýryz kúnderi is-sharalardy televiziialyq kórsetilimge kóshirýge týra keldi, – dedi Shymkent qalasy ákiminiń birinshi orynbasary.
Brifing barysynda Shyńǵys Jumabekuly mádeniet salasy boiynsha sóz qozǵady.
Onyń aitýynsha, órkenietti elderde mádeniet salasyna kóp kóńil bóledi. Iaǵni, kreativti qala damý negizine ainalady. Tipti mádeniet infraqurylymnan da mańyzdy.
Shyńǵys Jumabekulynyń sózine súiensek, búginde Shymkent qalasynyń mádeniet salasyna tolyq analiz jasalynyp, damý jospary naqty bekitilgen. Onyń ishinde kitaphanalardy jańǵyrtý basty nazarǵa alynǵan.
