Búgingi jarysqa Izraıl, Qyrǵyzstan, Reseı, Belorýsıa, Ózbekstan, Japonıa, Vetnam jáne Qazaqstan quramasynyń 100-ge jýyq sportshylary eki jas erekshelik boıynsha kópsaıys túrinen saıysqa túsedi.
Sporttyq sharanyń ashylý saltanatyna qatysqan Ońtústik Qazaqstan oblysynyń ákimi J.Túımebaev barsha týrnırge qatysýshy sportshylarǵa qosh keldińizder deı otyryp, jas sportshylarǵa sáttilik tiledi.
– Elimizdiń maqtanyshy Álıa Iýsýpova kórkem gımnastıkadan Azıa oıyndarynyń eki dúrkin absolútti jeńimpazy. Afına jáne Beıjiń qalalarynda ótken jazǵy Olımpıada oıyndarynda el namysyn abyroımen qorǵaǵan. Baıraqty básekede el namysyn abyroımen qorǵap, týymyzdy kókke kóterdi. Búginde kórkem gımnastıkadan QR bas jattyqtyrýshysy qyzmetin abyroımen atqaryp kele jatqan sport salasynyń biregeı bilikti mamany, – dedi ákim.
Álıa Maqsutqyzy basqaratyn kórkem gımnastıka mektebiniń ashylǵanyna nebári 7 jyl ǵana bolǵanyna qaramastan sportshylary birneshe bıiktikterdi baǵyndyryp úlgerdi. Byltyrǵy jyly Brazılıada ótken 31-shi jazǵy Olımpıada oıyndarynda Álıanyń tól shákirti Sábına Áshirbaeva nebári 16 jasynda óner kórsetip, joǵary kórsetkishterge ıe boldy.
Aıta keteıik, búgingi tańda, oblystyq kórkem gımnastıka sport mektebinde 39 jattyqtyrýshy 289 balaǵa oqý-jattyǵý jumystaryn júrgizýde.
Oblysymyzda osy sport túrinen halyqaralyq dárejedegi sport sheberi, jazǵy Azıa oıyndary men Azıa chempıonatynyń qola júldegeri, 2016 jyly Rıo-de-Janeıro qalasynda ótken jazǵy Olımpıada oıyndarynyń qatysýshysy, Qazaqstan Respýblıkasynyń birneshe dúrkin chempıony Sabına Ashırbaeva, halyqaralyq dárejedegi sport sheberi, jasóspirimder arasynda toptyq jattyǵýdan Azıa chempıony, Qazaqstan Respýblıkasynyń birneshe dúrkin chempıony Amına Rýstemova men halyqaralyq dárejedegi sport sheberi, jasóspirimder arasynda úsh dúrkin Azıa chempıony, QR birneshe dúrkin chempıony Alına Adılhanova jáne kóptegen sport sheberleri, halyqaralyq, respýblıkalyq jarystardyń jeńimpazdary men júldegerleri bar.
2011-2016 jyldary aralyǵynda jas erekshilikteri boıynsha mektep gımnastshylary Qazaqstan Respýlıkasynyń chempıondary, Azıa Oıyndary men Azıa chempıonattarynyń júldegerleri jáne Ispanıa, Estonıa, Reseı, Ózbekstan, Qyrǵyzstan, Belorýsıa, Týrkıa jáne Qazaqstan elderinde ótken birqatar halyqaralyq jarystardyń jeńimpazdary men júldegerleri atandy.
Osy jyldar aralyǵynda mektep gımnastshylary túrli deńgeıdegi jarystarǵa qatysyp, 123 – altyn, 130 – kúmis jáne 167 – qola medaldarǵa qol jetkizgen.
OQO ákiminiń baspasóz qyzmeti
