Shymkentte «Eńlikgúl» ortalyǵy boi kóteredi
Aimaq basshysy, eń aldymen, Shymkent qalasyn aralaý barysynda bolǵan birqatar kemshilikterge toqtalyp, Arǵynbekov kóshesi, Temirlan tas joly jáne basqa kóshelerdegi oryn alyp jatqan turǵyn úilerdiń qasbetteri men aýlalarynyń sáýlettik kelbetteri talapqa sai emestigin, birkelki sáýlettik stildiń joqtyǵyna nazar aýdardy. Sondai-aq, bas jospar boiynsha jasalyp jatqan qurylys jumystarynyń júieliliginiń tiisti mamandar tarapynan qadaǵalanbaýynyń saldarynan qala kelbetiniń keleńsiz jaǵdaida qalyp otyrǵanyn atap ótti. Ár basqarma óz salasyna qatysty tiisti jumystaryn ýaqytyly jáne sapaly atqarýy qajettigin talap etti.
– Shymkent qalasynyń Bas josparyndaǵy tujyrymdamaǵa sáikes, qala aýmaǵynda júrgizilip jatqan qurylys nysandarynyń basty baǵyttaryn anyqtap, bir júiege túsirý amaldaryn qarastyrý búgingi májilistiń kún tártibine qoiylǵan. D.Qonaev gúlzaryn Tashkent baǵytyna shyǵarý, qala ortalyǵyndaǵy Qoshqar ata ózeniniń boiyn abattandyrý jáne "Eski qalashyq" aýmaǵyn retteý jumystarynyń barysynda anyqtalǵan máseleler osyndai májilisterde talqylanyp, oń sheshimin tabýy tiis. Qazirgi tańda qalalyq Qala qurylysy Keńesiniń jáne oblystyq Qala qurylysy Keńesiniń arasynda bolyp jatqan alshaqtyqtyń saldarynan joǵaryda aitylǵan kemshilikter oryn alyp otyr. Osyǵan bailanysty, oblystyq Qala qurylysy Keńesiniń quramyn qaita qarap, jumysyn jandandyrý birinshi kezektegi másele, – dedi J.Túimebaev.
Basqosýda aimaq basshysy joǵaryda aitylǵan máselelerdiń mańyzdylyǵyn eskere otyryp, respýblikamyzdyń basqa qalalarynda, ásirese, Astana jáne Almaty qalalarynda iske asyrylyp jatqan zamanaýi sáýlettik jobalardyń avtorlaryn óńirge shaqyryp, tájiribe almasý jumystaryn jolǵa qoiý qajettigin eskertti.
Osy turǵyda Almatydan arnaiy shaqyrylǵan "Effekt" JShS-niń direktory Jandos Nurbekovtyń 3D formatyndaǵy eki jobasynyń beineroligi tanystyryldy. Olardy talqylaý barysynda "Edelveis" nemese "Eńlikgúl" gúline uqsas etip jasalǵan oiyn-saýyq ortalyǵynyń (aýmaǵy 4-6 gektar jerdi qamtidy) jobasyn Shymkent qalasynda, atap aitqanda, búgingi tańda igerilip jatqan «Turan» shaǵyn aýdanyna salý usynyldy. Al tarihi-etnografiialyq týristik nysan retinde taza qazaq aýylyn elestetetýdi maqsat tutyp, kórsetilgen ekinshi jobany Túrkistan qalasyna salýdyń múmkindigin qarastyrý tapsyryldy.
Aita ketetin jaǵdai, eńlikgúl úlgisindegi mundai nysan TMD elderinde joq. Al Túrkistanda salynýy tiis jobanyń ereksheligi – onyń baǵzy zamannyń shynaiy kórinisin qalyptastyrýynda. Iaǵni, rýhani astanada atalǵan joba boi kóteretin bolsa, avtokólik, elektr baǵanalary siiaqty búgingi órkeniettiń qajettilikteri bolmaidy.
Kezdesýde Shymkent qalasynyń ákimi Ǵabidolla Ábdirahymov shahardyń sáýlettik kelbeti boiynsha baiandama jasap, Shymkent qalasy bas josparynyń ózektendirý jumystarynyń 1-shi jáne 2-shi kezeńi oryndalyp qabyldanǵanyn, endi 3-shi kezeńniń jumystaryn júrgizý 2017 jyldyń naýryz aiyna josparlanǵanyn jetkizdi.
OQO ákiminiń baspasóz qyzmeti
