Shymkent qalasyndaǵy eski qalashyqta ashyq aspan astyndaǵy murajaı bolady. Qalashyqtyń taǵdyry jónindegi másele sońǵy birneshe jyl boıy qozǵalyp kelgen edi. Endi, mine, arnaıy baǵdarlamanyń nátıjesinde bul tarıhı eskertkish týrıser men kóneniń kózine qyzyǵatyn jandar úshin erekshe orynǵa aınalmaq. Kóne qalashyq mańynda sońǵy ondaǵan jyl boıy salynǵan qurylys nysandary súriledi. Olardyń ornyna qorǵan-qabyrǵa soǵylatyn bolady.
Ol qalashyqty kezinde qorshap turǵan qorǵanǵa uqsas etip salynady.
Qorǵandy boılaı qolónershilerdiń týyndylary men sheberlik oryndary ornalasyp, naǵyz demalys orny paıda bolady. Al qorǵannyń ishinde kóneniń kózine qyzyǵatyn barsha jandar úshin ashyq aspan astyndaǵy naǵyz mýzeı bolady. Onda sáýletshiler ózderiniń qazba jumystaryn jalǵastyra bermek.
Bul tusta Áıteke bı kóshesi keńeıtilip, al Qonaev dańǵyly eski qalashyq arqyly jalǵasyp, Áıteke bı kóshesine baryp qosylatyn bolady. Qurylys jumysy 2018 jyly bastalady. Negizgi bóligi 2020 jylǵa qaraı aıaqtalmaq. Osy jyly qalashyq ornynda Shymkent óziniń 2200 jyldyǵyn atap ótedi dep josparlanýda. Aıta keteıik, Shymqalanyń bul jasy osy qalashyqta júrgizilgen qazba jumystarynyń nátıjesinde tabylǵan jádigerlermen naqtylanǵan.
