ShQO ákimi Danial Ahmetov jerlesteri atynan Olga Rypakovaǵa Toyota Land Cruiser Prado avtokóligi men 50 myń AQSh dollaryn syiǵa tartty. Aýyr atletshi Denis Ýlanovqa eki bólmeli páter kiltin tabys etti.
Búgin Óskemen qalasynda Qazaqstan Respýblikasynyń Konstitýtsiiasy kúni aiasynda Rio qalasynda ótken Olimpiada oiyndarynyń qatysýshylary marapattaldy.
Shyǵysqazaqstandyq ózge sportshylarǵa – disk laqtyrýshy Evgenii Labýtovqa, marafondyq qashyqtyqqa júgiretin jeńil atletshi Irina Smolnikovaǵa, 400 m júgirýden jeńil atletshi Elina Mihinaǵa jáne eskek esýden Ekaterina Smirnovaǵa oblys ákiminiń jyldyq shákirtaqysy tabys etildi.
Dańqty sportshylardy jankúierler atynan ShQO ákiminiń orynbasary Jaqsylyq Omar quttyqtady.
– Olga Rypakova – Olimpiada oiyndarynda óner kórsetip, Qazaqstan atynan jeńil atletikadan júldeli bolǵan jalǵyz sportshy. Elbasymyz aityp ótkendei, Olga Rypakova tek sportshy ǵana emes, sonymen qatar ol batyr ana, – dedi Jaqsylyq Omar.
Óz kezeginde Olga Rypakova jankúierlerine kórsetken qoldaýlary úshin alǵysyn bildirdi.
– Rioda ótken Olimpiadadan keiin men taǵy bir jarysqa óner kórsetýge attanyp kettim. Sondyqtan, eki saiystan keiin Shyǵys Qazaqstanǵa, Óskemenge jetý men úshin úlken qýanysh. Ár kún saiyn áleýmettik jelilerde qoldaý men tilek bildirgenderińiz úshin alǵys bildiremin. Sizderdiń qoldaýlaryńyzsyz bizdiń jetistigimiz de bolmas edi, – dedi Olga Rypakova.
