Almatylyq ashyq ádebıet mektebi (AAÁM), «Shevron» kompanıasy jáne American Space áleýmettik alańynyń birlesken jobasynyń aıasynda, 2019 jyldyń qańtar-naýryz aılarynda oqytýshylar Dına Mahmetova jáne Mereı Qosyn jas avtorlarǵa arnalǵan proza jazýdyń sheberlik synybyn qazaq tilinde ótkizgen bolatyn.
Sheberhanada shyǵarmashylyq baıqaýdyń jeńimpazy atanǵan 16-20 jas aralyǵyndaǵy on avtor bilim aldy.
Jınaqqa ártúrli janrlardaǵy shyǵarmalar, sonyń ishinde detektıvti, mıstıkalyq, fantasıkalyq, psıhologıalyq áńgimeler jáne ertegiler endi.
Mereı Qosyn, sheberhananyń jetekshisi jáne jınaqtyń redaktory:
«Menińshe, qazaq ádebıeti biraz ýaqytqa únsiz qaldy. Biraq bizdiń qazirgi qoǵam jáne ýaqyt ózindik daýysy bar tulǵalardy daıyndap jatyr. Sheberhanada jas jazýshylarmen jumys isteý barysynda men osyny anyq túsindim», – dep aıtty.
Jastar Ádebıeti Sheberhanasynda bilim alǵan 18 jasar Sabına Igilik:
«Sheberhana maǵan kóp nárseni úıretti dep aıta alamyn. Atap aıtsam, ıdeıasy aıqyn, oqıǵasy qyzyqty kórkem shyǵarmalardy jazýdyń, detaldarǵa mán berýdiń qajettiligin túsindim. Sheberhanaǵa kelgenge deıin kóbinese qazaq ádebıetin oqıtyn edim, al qazir shetel avtorlarynyń shyǵarmalarymen tanysyp, jan-jaqty izdenip júrmin», – dep óz pikirin bildirdi.
Bul 2016-2019 jyldarynda uıymdastyrylǵan altynshy Jastar ádebıeti sheberhanasy. Sabaqtar aptasyna bir ret ótkizilip, ádebıet teorıasyna ǵana emes, Sheberhanaǵa qatysýshylardyń úı tapsyrmalaryn talqylaýǵa arnalǵan bolatyn. Oqytý tegin boldy.
Oqý barysynda jas prozashylar jazýshylyq sheberliktiń negizgi daǵdylaryn meńgerip, proza janrlarynyń zańdylyqtarymen tanysyp, kórkem mátindi redaksıalaýdy úırendi. Ánnás Baǵdat, Álibek Baıbol, Murat Qolǵanat, Tilek Yrysbek syndy qazirgi qazaqstandyq jazýshylarmen shyǵarmashylyq kezdesýlerge qatysty.
Anyqtama:
Almatylyq ashyq ádebıet mektebi 2009 jyldan beri jumys isteı otyryp, ádebıet teorıasynan jáne jazýshylyq sheberliginen 500-ge jýyq tyńdaýshysyna bilim berdi. 2016 jyly AAÁM «Orys syılyǵynyń» «Reseı Federasıasynan tys orys mádenıetiniń dástúrlerin damytqany jáne saqtaǵany úshin» erekshe júldesin aldy.
Dına Mahmetova – prozashy, dramatýrg, teatrtanýshy (ónertaný magıstri). «Mýsaget» qoǵamdyq qory uıymdastyrǵan «Master-klass» atty jazýshylyq sheberlikke úıretetin ádebı semınarǵa qatysýshy.
Almatylyq ashyq ádebıet mektebindegi dramatýrgıa semınarynyń jetekshisi, T.Júrgenov atyndaǵy Qazaq ulttyq óner akademıasynyń oqytýshysy. Birqatar pesalar, kınosenarııler, povesterdiń, drama teorıasy týraly ǵylymı maqalalardyń avtory. Qazirgi dramatýrgıa festıválderiniń qatysýshysy (Qazaqstan, Ózbekstan).
Mereı Qosyn – dramatýrg, senarıst, ónertaný magıstri.
