Buryn terrorizmdi nasihattaǵany jáne basqa da qylmystary úshin qamaýǵa alynǵan eki QR azamatyna qatysty sot protsesteri aiaqtaldy, - dep habarlaidy Dalanews.kz.
Solardyń biri – Taraz turǵyny, ainalasyndaǵylardy sheteldegi lańkester qatarynda soǵys áreketterine qatysýǵa shaqyryp, sonymen qatar ózi de olarǵa qosylýdy josparlaǵan.
Taraz qalalyq sotynyń sheshimimen ol terrorizmdi nasihattaǵany (QK-niń 256-baby), dini arazdyqty qozdyrǵany úshin (QK-niń 174-baby) kináli dep tanylyp, 7 jylǵa bas bostandyǵynan aiyryldy.
Taǵy bireýi – Almaty turǵyny, jalpy qylmystar úshin birneshe ret sottyly bolǵan, ǵalamtor jelisinde radikaldy ideologiiany nasihattaǵan.
Almaty qalalyq sotynyń sheshimimen ol terrorizmdi nasihattaǵany (QK-niń 256-baby), esirtkini zańsyz paidalanǵany úshin (QK-niń 296-baby) kináli dep tanylyp, 7 jyl 1 aiǵa bas bostandyǵynan aiyryldy.
Aita keteiik, 2024 jyl basynan terroristik jáne ekstremistik áreketteri úshin 84 adam sottalǵan.
