Sherzat Bolattyń otbasynda taǵy bir adam qamaýǵa alyndy, dep habarlaidy Dalanews.kz.
Sherzattyń otbasyn qoldaýǵa arnalǵan áleýmettik jelidegi paraqshada Qarjaýbai Nurymovtyń kúieýbalasy Aiǵazy 15 táýlikke qamaýǵa alynǵany jazylǵan.
Eske salaiyq,búgin Sherzat Bolattyń ákesi men ápkesi qamaýǵa alynǵany belgili boldy.
Eńbekshiqazaq aýdandyq soty ákimshilik is júrgizý tártibimen isterdi qaraý nátijeleri boiynsha azamat Saltanat Nurymova usaq buzaqylyq jasaǵany úshin (ÁQBtK 434-babynyń 1-bóligi) 20 AEK mólsherinde aiyppul salýmen ákimshilik jaýapkershilikke tartyldy.
QR beibit jinalystardy uiymdastyrý jáne ótkizý tártibi týraly zańnamasyn buzǵany úshin (ÁQBtK 488- babynyń 8-bólimi.) azamattyǵy joq Baqyt Reimova ákimshilik tártippen 15 táýlikke qamaýǵa alynyp, keiinnen QR sheginen shyǵaryp jiberildi.
Qoǵamdyq orynda balaǵat sózder aitqany, quqyq qorǵaý organdarynyń qyzmetkerlerin qorlap, sondai-aq qoǵamdyq tártip pen azamattardyń tynyshtyǵyn buzatyn ainalasyndaǵylarǵa qurmetsizdik tanytatyn is-áreketter jasaǵany jáne kólik quraldarynyń qozǵalysy úshin kedergiler jasaǵany úshin Qarjaýbai Nurymov 15 táýlikke ákimshilik qamaýǵa alyndy.
10 jeltoqsanda marqum Sherzat Bolattyń otbasy Nurqanat Ǵaiypbaevty jer qoinyna tapsyrdy. Jerleý rásiminen keiin Qarjaýbai Nurymov qolyna pyshaq ustap, BAQ ókilderimen kezdesýdi talap etti. Atalǵan oqiǵadan keiin Nurymovty politsiia qyzmetkerleri ustap áketti.
Resmi derekke súiensek, saǵat 15:30 shamasynda Azat aýylynda jerleý rásimi kezinde qoǵamdyq tártip buzylǵan. Aitýlarynsha, Qarjaýbai Nurymov qolyna pyshaq ustap, óz-ózine qol jumsamaq bolǵan.
"Qarjaýbai Nurymov prokýrordyń zańdy saqtaý týraly túsindirmelerin elemedi. Shekten tys agressivti minez-qulyq tanytyp, basqalardy óz-ózine qol jumsaimyn dep qorqytty. Sonymen qatar politsiia qyzmetkerine pyshaqpen shabýyl jasady. Onyń minez-qulqy ózine de, basqalarǵa da qaýip tóndirdi", - delingen habarlamada.
